Chelsea yirukanye umutoza Antonio Conte nyuma y'imyaka ibiri ayitoza

Umutoza Conte yatwaye shampiyona ya Premiere League n'igikombe cya FA mu myaka ibiri yamaze atoza Chelsea Uwufise ububasha kw’isanamu Reuters
Image caption Umutoza Conte yatwaye shampiyona ya Premiere League n'igikombe cya FA mu myaka ibiri yamaze atoza Chelsea

Chelsea imaze kwirukana umutoza Antonio Conte nyuma y'imyaka ibiri yari amaze atoza iyi kipe yo mu mujyi wa London mu Bwongereza.

Conte, Umutaliyani w'imyaka 48 y'amavuko, wari watangiye gukoresha imyitozo yo kwitegura umwaka mushya w'imikino wa shampiyona, yari asigaranye umwaka umwe muri kontaro ye.

Conte yatwaye shampiyona ya Premiere League mu mwaka we wa mbere atoza Chelsea ndetse n'igikombe cya FA mu kwezi kwa gatanu.

Ariko Chelsea yarangije iri ku mwanya wa gatanu mu mwaka ushize w'imikino, ibura ityo tike yo kwitabira imikino ya Champions League.

Byitezwe ko undi Mutaliyani Maurizio Sarri, wahoze atoza ikipe ya Napoli yo mu Butaliyani, ari we ugiye kumusimbura.

Aramutse abaye ari we umusimbuye, yaba abaye umutoza wa cyenda Chelsea igize kuva yagurwa na Roman Abramovich mu mwaka wa 2003.

Kuri uyu wa gatanu nibwo Chelsea yatangaje ko Conte "yatandukanye" n'iyi kipe.

Mu itangazo rigizwe n'interuro ebyiri, ubuyobozi bwa Chelsea bwagize buti:

"Twifurije Antonio ishya n'ihirwe mu mirimo ye iri imbere."

Bubaye ubwa gatandatu mu myaka umunani y'imikino umutoza watwaye shampiyona ya Premiere League asezererwa ku kazi ku mpeshyi ikurikiyeho - niba ahubwo atari mbere yaho.

Muri kontaro Conte yari afitanye na Chelsea, harimo ingingo ivuga ko yemerewe imperekeza, bivugwa ko ingana na miliyoni 9 z'amapawundi, mu mwaka we wa nyuma w'akazi.

Umukino wa mbere wa Premiere League w'uyu mwaka Chelsea izawukina na Huddersfield - ku kibuga cya Huddersfield - ku itariki ya 11 y'ukwezi gutaha kwa munani.