Kylian Mbappe yaba agiye gusimbura Cristiano na Messi mu buhangange mu mupira w'amaguru ku isi?

Kylian Mbappe yakuze akinira ikipe yitwa Bondy yo mu nkengero z'umurwa mukuru w'Ubufaransa, Paris, kandi kuva icyo gihe cy'ubuto bwe byarigaragazaga ko afite impano y'umupira w'amaguru
Image caption Kylian Mbappe yakuze akinira ikipe yitwa Bondy yo mu nkengero z'umurwa mukuru w'Ubufaransa, Paris, kandi kuva icyo gihe cy'ubuto bwe byarigaragazaga ko afite impano y'umupira w'amaguru

Rio Ferdinand, wahoze ari myugariro w'ikipe y'igihugu y'Ubwongereza, aravuga ko Lionel Messi na Cristiano Ronaldo "bari guhereza ikamba" Umufaransa Kylian Mbappe mu buhangange mu mupira w'amaguru ku rwego rw'isi.

Mbappe w'imyaka 19 y'amavuko, yatsinze igitego cya kane ubwo Ubufaransa bwatsindaga Croatia 4-2 ku cyumweru mu mukino wa nyuma w'igikombe cy'isi cya 2018 wabereye i Moscow mu Burusiya.

Ubufaransa bwegukanye igikombe, Mbappe anatsindira igihembo cy'umukinnyi ukiri muto witwaye neza kurusha abandi muri iri rushanwa.

Ferdinand wahoze akina no mu ikipe ya Manchester United, yongeyeho ati:

"Ni umusore uzajya aba ari mu bahatanira igikombe cya Ballon d'Or mu myaka iri imbere."

Ati: "Nizeye ko ikipe nahoze nkinamo iri kumushakisha. Anafite ukuntu akinana neza na Pogba."

Mu mateka y'isi, rutahizamu Mbappe w'ikipe ya Paris St-Germain abaye umukinnyi wa kabiri muto utsinze igitego mu mukino wa nyuma w'igikombe cy'isi kuva Pele na we yagitsinda mu mwaka wa 1958.

Ronaldo w'imyaka 33 y'amavuko na Messi w'imyaka 31 y'amavuko, bamaze imyaka 10 bafatwa nk'abakinnyi b'intyoza mu mupira w'amaguru kurusha abandi ku isi.

Hagati yabo, basaranganyije ibihembo bya Ballon d'Or byo mu myaka 10 ishize.

Mbappe yatsinze ibitego bine mu gikombe cy'isi cyaberaga mu Burusiya ubwo Ubufaransa bwongeraga kwisubiza igikombe cy'isi bwaherukaga mu mwaka wa 1998.

Ferdinand yagize ati: "Akina ku rwego rurenze ikigero cy'imyaka ye."

Naho Jurgen Klinsmann, wahoze ari rutahizamu n'umutoza w'Ubudage, yabwiye ikiganiro cya BBC gica kuri televiziyo cya World Cup Match of the Day ko Mbappe yakinaga nk'umaze "imyaka 10" akina mu ikipe y'igihugu y'Ubufaransa.