Usain Bolt yaba agiye gukina umupira w'amaguru muri Australia mu buryo bwo kwimenyereza

Usain Bolt uyu mwaka yakinnye imikino imwe n'imwe mu buryo bwo kwigaragaza Uwufise ububasha kw’isanamu EPA
Image caption Usain Bolt uyu mwaka yakinnye imikino imwe n'imwe mu buryo bwo kwigaragaza

Ikipe y'umupira w'amaguru yo muri Australia yatangaje ko Usain Bolt watwaye imidari umunani mu gusiganwa ku maguru mu marushanwa ya Olympike, ari mu biganiro nayo kugira ngo ayikinire mu buryo bwo kwimenyereza.

Bolt, Umunyajamaica w'imyaka 31 y'amavuko, ari mu biganiro kugira ngo akinire ikipe ya Central Coast Mariners yo mu cyiciro cya mbere muri Australia mu gihe cy'ibyumweru bitandatu.

Umuyobozi w'iyi kipe, Shaun Mielekamp, yavuze ko imaze amezi ane ishakisha Bolt, ndetse ko bishoboka ko yahita anayikinamo mu gihe cy'umwaka w'imikino.

Tony Rallis ukora mu byo gushakira abakinnyi amakipe bakinamo muri Australia, yavuze ko urebye bisa nkaho byamaze kwemezwa ko Bolt azakinira ikipe ya Central Coast Mariners.

Bwana Rallis ni na we wagize uruhare mu gushakira ikipe Bolt. Yabwiye Radio Sky Sports yo muri Australia ko ibiganiro bikomeje ku mushahara Bolt azajya ahembwa.

Bwana Rallis yagize ati: "Nyir'ikipe ya Central Coast Mariners yakoze mu mufuka we yizeza ko we ku giti cye azatanga 70% by'umushara [wa Bolt]."

Igitangazamakuru News Corp Australia cyatangaje ko amasezerano akubiyemo umushahara wa Bolt abarirwa muri "miliyoni nyinshi z'amadolari y'Amerika."

Mu gihe cyashize, Bolt yitoreje umupira w'amaguru mu makipe yo mu Budage, Norvège n'Afurika y'epfo.

Mu mwaka ushize nibwo Bolt yasezeye ku gusiganwa ku maguru. Afite uduhigo tw'isi mu kwiruka metero 100 na metero 200.

Yari yarigeze kuvuga ko ashaka kuba umukinnyi w'umupira w'amaguru wabigize umwuga.

Ni umufana w'ikipe ya Manchester United yo mu Bwongereza ndetse umwe mu bari abatoza be, Mike Phelan, ubu akora mu mikipe ya Central Coast Mariners.

Ibindi bisa n’ibi