Ethiopia yatangaje Abraham Mebratu nk'umutoza wayo mushya

Umutoza wa Ethiopia Abraham Mebratu yahesheje Yemen itike yo kwitabira bwa mbere imikino ihuza ibihugu byo muri Aziya Uwufise ububasha kw’isanamu Getty Images
Image caption Umutoza wa Ethiopia Abraham Mebratu yahesheje Yemen itike yo kwitabira bwa mbere imikino ihuza ibihugu byo muri Aziya

Ishyirahamwe ry'umupira w'amaguru muri Ethiopia ryatangaje ko Abraham Mebratu wahoze atoza ikipe y'igihugu ya Yemen ari we mutoza mushya w'ikipe y'igihugu ya Ethiopia.

Bwana Mebratu w'imyaka 48 y'amavuko, yeguye ku mirimo yo gutoza Yemen mu kwezi kwa karindwi uyu mwaka nyuma yo guhesha Yemen itike yo kuzakina imikino ya nyuma y'igikombe gihuza ibihugu byo ku mugabane w'Aziya yo mu mwaka utaha wa 2019.

Hari hashize amezi arindwi ikipe y'igihugu ya Ethiopia nta mutoza ifite.

Itangazo ry'ishyirahamwe ry'umupira w'amaguru muri Ethiopia rigira riti:

"Azasinya kontaro y'imyaka ibiri kandi turashishikariza abakunzi b'umupira w'amaguru kumuba hafi."

Bwana Mebratu yasezeye ku kazi ke ko gutoza ikipe y'igihugu ya Yemen kubera ko nta bufasha bw'amafaranga yahabwaga mu kwitegura imikino iki gihugu kizaba kitabiriye bwa mbere ihuza ibihugu byo ku mugabane w'Aziya.

Yanifuje kenshi gutoza ikipe y'igihugu ya Ethiopia izwi ku izina rya Waliya Antelopes, yigeze no kubamo umutoza wungirije ndetse akanatoza mu makipe y'ingimbi z'iyi kipe.

Uyu mwanya wo gutoza Ethiopia awusimbuyeho Ashenafi Bekele, weguye ku mirimo ye mu kwezi kwa cumi na kabiri k'umwaka ushize wa 2017 nyuma yaho iyi kipe yitwaye nabi mu mikino yo mu karere ya CECAFA.

Umukino we wa mbere ukomeye azawutoza ubwo Ethiopia izaba yakiriye Sierra Leone mu kwezi kwa cyenda uyu mwaka, mu mikino y'amajonjora y'igikombe cy'Afurika cy'ibihugu cyo mu mwaka wa 2019.

Ni nyuma y'umukino ubanza wo muri aya majonjora Ethiopia yanyagiwemo na Ghana ibitego 5-0.

Ibindi bisa n’ibi