Jurgen Klopp "ntacyo bimubwiye" kunengwa mu buryo agura abakinnyi

Klopp yabivuze mbere y'umukino wa mbere wo kuri iki cyumweru Liverpool ikina na Borussia Dortmund, mu mikino igiye gukinira muri Amerika yitegura gutangira shampiyona Uwufise ububasha kw’isanamu Getty Images
Image caption Klopp yabivuze mbere y'umukino wa mbere wo kuri iki cyumweru Liverpool ikina na Borussia Dortmund, mu mikino igiye gukinira muri Amerika yitegura gutangira shampiyona

Umutoza Jurgen Klopp w'ikipe ya Liverpool aravuga ko "ntacyo bimubwiye" kuba hari abamurega kuba indyarya bijyanye n'amafaranga akoresha mu kugura abakinnyi.

Mu mwaka wa 2016 ubwo umukinnyi Paul Pogba yerekezaga mu ikipe ya Manchester United aguzwe miliyoni 89 z'amapawundi, umutoza Klopp yavuze ko yasezera ku butoza amafaranga angana atyo akomeje gutangwa mu kugura abakinnyi mu mupira w'amaguru.

Ariko umunyezamu Alisson Liverpool iherutse kugura kuri miliyoni 66 n'ibihumbi 800 by'amapawundi imukura mu ikipe ya AS Roma, yatumye amafaranga Liverpool imaze kugura abakinnyi mu mezi 12 ashize agera kuri miliyoni 250 z'amapawundi.

Bwana Klopp yagize ati: "Ntacyo bitubwiye icyo isi iri gutekereza kuri ibi."

Ati: "Nkuko na Manchester United nayo ibyo navuze icyo gihe ntacyo byayibwiye."

Umudage Klopp utoza Liverpool yongeyeho ati:

"Ni igitekerezo cyanjye natanze gusa muri icyo gihe. Naba narahinduye icyo gitekerezo? Yego. Ibyo ni ukuri. Ariko ni byiza kurushaho kwisubiraho ku ijambo kurusha kutagira na rimwe igitekerezo utanga."

Ati: "Ubu dufite abakinnyi twifuza."

Mu kwezi kwa mbere, Liverpool yatanze miliyoni 75 z'amapawundi igura myugariro Virgil van Dijk wakiniraga Southampton - amafaranga itari bwigere igura umukinnyi mbere.

Mbere yaho, Liverpool yemeye kugura umukinnyi wo hagati Naby Keita imukura mu ikipe ya RB Leipzig ku giciro kirenzeho miliyoni 50 z'amapawundi, nubwo bwose iyi kipe yo muri shampiyona ya Bundesliga yo mu Budage itashoboye kubona itike yo gukina Champions League, ikintu ubundi kigabanya igiciro.

Kuri iyi mpeshyi, umutoza Klopp yaguze Umunyabrezili Fabinho ukina hagati mu kibuga amuguze n'ikipe ya Monaco ku giciro gishobora kuba kirenga miliyoni 40 z'amapawundi, ndetse n'umukinnyi wo hagati Xherdan Shaqiri yakuye mu ikipe ya Stoke kuri miliyoni 13 z'amapawundi.

Hari mbere yo guca agahigo k'isi k'umunyezamu uhenze cyane. Ni umunyezamu Alisson, wabanzaga mu izamu mu ikipe y'igihugu ya Brezili mu gikombe cy'isi giheruka.