Neymar aravuga ko yari "mu cyunamo" nyuma yo gusezererwa mu gikombe cy'isi

Neymar n'ikipe ye ya Brezili bari mu bahabwa amahirwe yo kwegukana igikombe cy'isi cy'uyu mwaka, ariko baviramo muri kimwe cya kane
Image caption Neymar n'ikipe ye ya Brezili bari mu bahabwa amahirwe yo kwegukana igikombe cy'isi cy'uyu mwaka, ariko baviramo muri kimwe cya kane

Neymar yavuze ko "atigeze ashaka kubona umupira wo gukina mu maso ye" cyangwa ngo arebe imikino yakurikiyeho y'igikombe cy'isi nyuma yaho Brezili isezerewe n'Ububiligi muri kimwe cya kane cy'irangiza mu gikombe cy'isi cy'uyu mwaka giheruka kubera mu Burusiya.

Neymar yagize ati: "Nari mu cyunamo, nari mbabaye cyane rwose, ariko akababaro karashira."

Ati: "Mfite umwana w'umuhungu, mfite umuryango, mfite inshuti, kandi bose ntibaba bashaka kumbona ndi aho ngendagenda ntacyo mfite cyo gukora."

Neymar yanavuze ko amakuru avuga ko yaba agiye kwerekeza mu ikipe ya Real Madrid ari "ibihuha."

Ku mpeshyi ishize nibwo Neymar w'imyaka 26 y'amavuko yageze mu ikipe ya PSG avuye muri Barcelona aguzwe miliyoni 200 z'amapawundi - amafaranga atari bwigere agurwa undi mukinnyi mbere mu mateka y'umupira w'amaguru ku isi.

Amaze gutsindira PSG ibitego 28 mu marushanwa atandukanye ndetse yanayifashije gutsindira ibikombe bitatu bikinirwa muri shampiyona y'Ubufaransa.

Neymar yanenzwe cyane ashinjwa kwigusha mu gikombe cy'isi giheruka, ariko we yavuze ko ahubwo abasifuzi bagombaga kuba baramurinze birushijeho ntakorerwe amakosa.

Yabwiye ibiro ntaramakuru AFP ati:

"Abantu bihutiraga kunenga ukorewe ikosa aho kunenga ukoze ikosa."

Yongeyeho ati:

"Nari nagiye mu gikombe cy'isi gukina umupira, guhangana n'andi makipe. Ntabwo ntari nagiyeyo ngo bantere imigeri. Uburyo banenze bararengereye, ariko jye ndi umuhungu ukuze. Ibyo menyereye guhangana nabyo."

Yagize ati: "Sinshobora kuba umusifuzi ngo nkine n'umupira icyarimwe, ariko hari ibihe bigera nkumva iyaba byashobokaga ko mbikora byombi icyarimwe."