Kuki bisigaye bigoye kongera kwisubiza igikombe cya Premiere League?

Mu mwaka ushize w'imikino, Manchester City yabaye ikipe ya mbere yo muri Premiere League igejeje ku manota 100 Uwufise ububasha kw’isanamu Getty Images
Image caption Mu mwaka ushize w'imikino, Manchester City yabaye ikipe ya mbere yo muri Premiere League igejeje ku manota 100

Manchester City yaciye uduhigo ubwo umwaka ushize w'imikino yatwaraga igikombe cya shampiyona y'umupira w'amaguru mu Bwongereza izwi nka Premiere League.

Ariko se izongera icyisubize?

Ubwo shampiyona ya Premiere League izaba yongeye gutangira ku wa gatanu w'icyumweru gitaha, iyi kipe itozwa na Pep Guardiola izaba igerageza gukora ibyananiye indi kipe iyo ari yo yose guhera mu mwaka wa 2009: kwisubiza igikombe cya shampiyona y'Ubwongereza.

Mbere y'umwaka wa 2009, iki gikombe cyari kimaze kwisubizwa n'amakipe inshuro zirindwi, ariko mu myaka icyenda yakurikiyeho nta kipe irashobora kucyisubiza.

Muri icyo gihe, ikipe ya Bayern Munich yo mu Budage yo yisubije igikombe cya shampiyona inshuro esheshatu yikurikiranya, Barcelona yo muri Espanye yisubiza ibikombe bikinirwa muri iki gihugu inshuro ebyiri yikurikiranya, Juventus yo mu Butaliyani itwara shampiyona yaho inshuro zirindwi yikurikiranya naho Paris Saint-Germain yo itwara shampiyona y'Ubufaransa inshuro enye yikurikiranya kuva hagati y'umwaka wa 2012 n'uwa 2016.

None, ni ukubera iki ibi bitandukanye no muri shampiyona ya Premiere League? BBC Sport yakusanyije impamvu z'ingenzi zishobora kuba zibitera.

Amafaranga - amakipe y'amacyeba agura abakinnyi bashya kurusha ikipe iba iheruka gutwara igikombe cya shampiyona

Amasezerano afite agaciro ka miliyari 5 na miliyoni 100 z'amapawundi iyi shampiyona igirana na za televiziyo, atuma amakipe agira ubushobozi bwo mu mufuka buruta ubw'andi makipe menshi yo ku mugabane w'Uburayi.

Ibi bivuze ko amakipe aba yarahushije igikombe cya Premiere League mu mwaka ubanza, aba noneho afite imbaraga zo kongera kwiyubaka ku mpeshyi ikurikiyeho yitegura umwaka utaha wa shampiyona.

Mu myaka icyenda ishize nyuma yaho Manchetser United ishoboye kwisubiza igikombe cya shampiyona mu mwaka wa 2009, ikipe iba iheruka gutwara iki gikombe yarushijwe n'iyagitwaye umwaka ukurikiyeho inshuro zikubye karindwi mu mafaranga yo kugura abakinnyi.

Aho ibyo bitabaye gusa ni kuri Manchester United mu mwaka w'imikino 2010-2011 no kuri Leicester mu mwaka w'imikino 2015-2016.

Uwufise ububasha kw’isanamu Getty Images
Image caption Maicon, Bartosz Kaputska, Jack Rodwell na Baba Rahman bose baguzwe nyuma yaho ikipe yabo imariye gutwara igikombe cya shampiyona

Amakipe aba aheruka gutwara igikombe cya shampiyona akomeza gukora amakosa ku isoko ryo kugura abakinnyi

Mu myaka itandatu ishize, abakinnyi Pedro na Marouane Fellaini ni bo bonyine baguzwe n'amakipe yaherukaga gutwara igikombe cya shampiyona bakagira umusaruro ugaragara batanga mu ikipe ya 11 babanza mu kibuga.

Bimaze kugaragara ko hari umuco ku ikipe iba iheruka gutwara Premiere League wo kugura abakinnyi nabi ubwo iba yitegura kugerageza kwisubiza iki gikombe.

"Andi makipe nayo akora iyo bwabaga"

Ferguson ni we mutoza wenyine washoboye kwisubiza igikombe cya shampiyona inshuro zirenze imwe. Yacyisubije inshuro esheshatu ubwo yatozaga Manchester United, kandi nyuma yo kugitwara bwa mbere mu mwaka wa 1992, yakoresheje amayeri atuma abakinnyi be batirara.

Damian Hughes, umwarimu wa kaminuza akaba n'impuguke mu mitekerereze y'abakinnyi, yagize ati:

"Sir Alex yabwiye abakinnyi ko ubuyobozi bw'ikipe bwanditse amazina y'abakinnyi babiri butekereza ko bishimiye gutwara igikombe."

"Ariko Ferguson ababwira ko abandi nabo bagifite amahirwe yo kugaragaza ko ibyo ubwo buyobozi butekereza atari byo."

Byaje kurangira mu mpera y'uwo mwaka w'imikino, iyi kipe yisubije igikombe cya shampiyona n'icya FA.

Ferguson na we avuga ko abo bakinnyi babiri ntabari bahari, ko ari uburyo bw'amayeri yari yakoresheje bwo gutuma abakinnyi batirara.

Ibisabwa mu gukinira ku mugabane w'Uburayi

Mu myaka ya vuba ishize, amakipe ya Leicester na Chelsea yahabwaga amahirwe yo gutwara igikombe cya shampiyona kubera ko atarimo gukina imikino ya Champions League.

Mu mwaka w'imikino wakurikiye, aya makipe yombi yananiwe kongera kwisubiza igikombe.

Imwe mu mpamvu zatanzwe, ni uko umubare w'imikino wiyongereye kubera amarushanwa atandukanye yo ku mugabane w'Uburayi.

Leicester yakinnye imikino 43 mu mwaka w'imikino wa 2015-2016, uyigereranyije n'imikino 54 yakinnye mu mwaka w'imikino wa 2016-2017 ubwo yarangizaga iri ku mwanya wa 12, mu gihe Chelsea yo yakinnye imikino 47 mu mwaka w'imikino wa 2016-2017, yiyongereye ikagera ku mikino 59 mu mwaka ushize ubwo yarangizaga iri ku mwanya wa gatanu.

Amakipe yombi yari asanzwe afite abakinnyi bahoraho babanza mu kibuga mbere yuko atwara igikombe cya shampiyona, ariko mu mwaka wakurikiye yahinduye inshuro zirenga ebyiri abakinnyi babanzaga mu kibuga.