Real Madrid yaguze umunyezamu Thibaut Courtois

Thibaut Courtois yabanje gukorerwa ikizamini cyo kwa muganga i Madrid cyo kureba niba ameze neza byo gukina, mbere yo gushyira umukono kuri kontaro kuri uyu wa kane Uwufise ububasha kw’isanamu EPA
Image caption Thibaut Courtois yabanje gukorerwa ikizamini cyo kwa muganga i Madrid cyo kureba niba ameze neza byo gukina, mbere yo gushyira umukono kuri kontaro kuri uyu wa kane

Umunyezamu Thibaut Courtois kuri uyu wa kane yashyize umukono kuri kontaro yo gukinira ikipe ya Real Madrdi yo muri Espanye mu gihe cy'imyaka itandatu.

Yari amaze imyaka irindwi akinira Chelsea yo mu Bwongereza.

Real Madrid ifite igikombe cya Champions League giheruka, yatangaje videwo yerekana Courtois - Umubiligi w'imyaka 26 y'amavuko - ashyira umukono kuri kontaro ari kumwe na Perezida w'iyi kipe, Florentino Perez.

Courtois yagize ati:

"Uyu munsi inzozi zanjye zibaye impamo."

Real Madrid ntiyatangaje amafaranga yaguze Courtois.

Ariko amakuru aravuga ko Courtois, wari ugifite umwaka wo gukinira Chelsea, yaguzwe agera kuri miliyoni 35 z'amapawundi.

Chelsea yaguze umunyezamu Kepa Arrizabalaga wakiniraga ikipe ya Athletic Bilbao ngo asimbure Courtois. Yamuguze miliyoni 71 z'amapawundi - amafaranga ya mbere menshi ku isi atanzwe ku munyezamu.

Uwufise ububasha kw’isanamu Getty Images
Image caption Kepa amaze gukinira ikipe y'igihugu ya Espanye inshuro imwe

Courtois yongeyeho ati:

"Iyi ni ikipe ya mbere ku isi."

Mu mwaka wa 2011 nibwo Courtois yageze mu ikipe ya Chelsea avuye mu ikipe ya Genk y'iwabo mu Bubiligi.

Icyo gihe yahise yoherezwa gukinira Atletico Madrid ku nguzanyo ayikinira kugeza mu mwaka wa 2014, mbere yuko agaruka muri Chelsea nk'umunyezamu ubanza mu izamu.

Ku wa mbere Courtois ntiyagaragaye mu myitozo y'ikipe ya Chelsea ku kibuga cya Cobham mu Bwongereza, aho yagombaga kuba ari nyuma yo kwitabira imikino y'igikombe cy'isi giheruka kubera mu Burusiya uyu mwaka.

Yatowe nk'umunyezamu wahize abandi mu gikombe cy'isi giheruka, aho Ububiligi bwatsinze Ubwongereza bukegukana umwanya wa gatatu.