Gerard Piqué yasezeye mu ikipe y'igihugu ya Espanye

Piqué (uri hagati afite n'igikombe) yakiniye Espanye imikino 102 ariko na n'ubu ntavugwaho rumwe muri Espanye Uwufise ububasha kw’isanamu Getty Images
Image caption Piqué (uri hagati afite n'igikombe) yakiniye Espanye imikino 102 ariko na n'ubu ntavugwaho rumwe muri Espanye

Myugariro Gerard Piqué w'ikipe ya Barcelona akaba n'uw'ikipe ya Espanye, yavuze ko yasezeye ku gukinira ikipe y'igihugu cye ya Espanye.

Piqué w'imyaka 31 y'amavuko, yakiniye ikipe ya Espanye imikino 102 hagati y'umwaka wa 2009 n'uyu wa 2018. Yayitsindiye ibitego 5.

Yari umwe mu bakinnyi b'ikipe ya Espanye yatwaye igikombe cy'isi cyo mu mwaka wa 2010 cyakiniwe muri Afurika y'epfo - bwa mbere mu mateka y'umugabane w'Afurika - ndetse anayifasha gutwara igikombe cy'Uburayi mu mwaka wa 2012.

Ku wa gatandatu, Piqué yagize ati:

"Navuganye na Luis Enrique [umutoza wa Espanye wahoze anatoza Barcelona] mu minsi micye ishize. Yarampamagaye nuko mubwira ko namaze gufata iki cyemezo hakaba hari hashize igihe kirekire kandi nkaba narabitekerejeho bihagije."

"Naryohewe no gukinira ikipe y'igihugu aho nashoboye gutwara igikombe cy'isi ndetse n'igikombe cy'Uburayi. Ubu noneho ndashaka kwibanda ku gukinira Barca."

Guhamagarwa kwe mu ikipe y'igihugu akenshi kwanezezaga abafana bamwe kukanababaza abandi, ku ruhande rumwe kubera ukuntu yagaragaje ko ashyigikiye kamarampaka igamije ubwigenge bw'intara ya Kataloniya.

Intara ya Kataloniya iri mu majyaruguru ashyira uburasirazuba bwa Espanye, ituwe n'abaturage miliyoni 7 n'ibihumbi 500. Aba baturage bavuga ururimi rumwe, bakagira umuco wabo ndetse Barcelona ni wo murwa mukuru w'iyi ntara.

Piqué yari yarigeze kuvuga ko ashaka gusezera mu ikipe y'igihugu nyuma y'imikino y'igikombe cy'isi giheruka kubera mu Burusiya uyu mwaka.

Icyo gihe abivuga hari mu mwaka wa 2016 mu mukino w'amajonjora y'igikombe cy'isi wahuje Espanye na Albania, ubwo yavugaga ko amaze kurambirwa guhora anengwa, avuga ko ashaka "kugira amahoro."

Piqué aracyari umuntu utavugwaho rumwe muri Espanye ndetse yakunze kunenga ikipe mucyeba ya Real Madrid.

Piqué yongeyeho ati:

"Ndacyasigaje imyaka micye yo gukina. Ngiye gukora kuburyo indyohera yose."

Mu mwaka ushize w'imikino, Barca yatwaye ibikombe bibiri muri Espanye birimo n'icya shampiyona.

Kuri iki cyumweru, byitezwe ko ikina na Sevilla mu gikombe cya Super Cup, umukino ubera i Tangier muri Maroc.

Ibindi bisa n’ibi