Umutoza wa Chelsea yavuze ko bishobora kuyifata amezi abiri ngo itangire ikine uko bikwiye
Ahavuye isanamu, AFP
Mu gihe Hazard yari yicaye ku ntebe y'abasimbura, Jorginho mushya muri Chelsea ni we wakinnye mu mwanya we, anatsinda igitego cya penaliti
Umutoza mushya wa Chelsea, Umutaliyani Maurizio Sarri, yaburiye ko iyi kipe bishobora kuyifata igihe cy'amezi abiri ngo itangire gukina uko bikwiye, nubwo bwose yatangiye imikino ya shampiyona y'uyu mwaka itsinda biyoroheye Huddersfield Town.
Ibitego bya N'Golo Kante, Jorginho na Pedro ni byo byatumye umutoza Sarri atangira akazi ke gashya neza.
Eden Hazard na Olivier Giroud - bakubutse mu mikino y'igikombe cy'isi giheruka kubera mu Burusiya uyu mwaka - binjiye mu kibuga nk'abasimbura.
Umutoza Sarri yagize ati:
"Uko ibintu bimeze kugeza ubu byarankomereye cyane."
"Ku wa mbere, abakinnyi bane bageze hano [mu myitozo] bavuye mu mikino y'igikombe cy'isi. Nuko ku wa kabiri nabwo haza abandi babiri, rero ntabwo byanyoroheye kugeza ubu."
Ku cyumweru gishize, Chelsea yatsinzwe na Manchester City 2-0 mu gikombe cya Community Shield.
Umutoza Sarri wahoze anatoza ikipe ya Napoli yongeyeho ati:
"Ngomba kumenya abakinnyi. Ngomba kwimenyereza uko iyi shampiyona iteye ndetse n'abakinnyi. Ubu ndikwiga abakinnyi banjye."
Mu mukino wa Premiere League ukurikira, Chelsea izakira Arsenal ku itariki ya 18 y'uku kwezi kwa munani, mu gihe Huddersfield yo izaba yagiye gukinira ku kibuga cya Manchester City ifite igikombe cya shampiyona cy'umwaka ushize - umukino uzaba ku itariki ya 19 y'uku kwezi kwa munani.
