Ku nshuro ya gatanu ikurikiranye, Umunyarwanda yegukanye Tour du Rwanda

Mugisha Samuel abaye Umunyarwanda wa gatanu utwaye Tour du Rwanda
Insiguro y'isanamu,

Mugisha Samuel abaye Umunyarwanda wa gatanu utwaye Tour du Rwanda

Mugisha Samuel w'ikipe y'u Rwanda ni we wegukanye irushanwa ry'amagare rya Tour du Rwanda.

Isiganwa ryose ryari rigizwe n'uduce 8 tureshya n'ibirometero 946. Mugisha aritsinze akoresheje amasaha 24 n'iminota 26 n'amasegonda 53.

Uwaje amukurikiye ni Uwizeye Jean Claude, Umunyarwanda ukinira ikipe ya Côte de Lumière yo mu gihugu cy'u Bufaransa. Hagati yabo harimo ikinyuranyo cy'amasegonda 21. Uwa gatatu yabaye Umunya-Ethiopia Hailemichael Mulu.

Agace ka nyuma ka 8 kari gafite uburebure bwa kirometero 107 mu kuzenguruka umujyi wa Kigali. Katwawe n'Umunya-Algeria Lagab Azzedine wakoresheje amasaha 2 n'iminota 6 n'amasegonda 20. Ni agace ke ka kabiri atwaye muri iri siganwa ryose.

Ku ruhande rw'amakipe, ikipe ya Côte de Lumière yo mu Bufaransa ni yo yarushije izindi mu kwitwara neza.

Insiguro y'isanamu,

Mugisha Samuel (wa mbere ibumoso) afite imyaka 21 y'amavuko

Iyi kipe kandi ikinamo n'undi Munyarwanda Ndayisenga Valens, akaba ari we wenyine umaze kwegukana Tour du Rwanda inshuro 2 - mu mwaka wa 2014 na 2016.

Abakinnyi 79 baturuka mu makipe 16 yo mu bihugu bitandukanye ku isi ni bo batangiye iri rushanwa, rikaba ryasojwe n'abakinnyi 43.

Amarushanwa ya Tour du Rwanda y'uyu mwaka yari ku rwego rwa 2.2 - ni yo ya nyuma ibaye iri kuri uru rwego.

Guhera mu kwezi kwa kabiri umwaka utaha, irushanwa rya Tour du Rwanda rikazaba riri ku rwego rwa 2.1 ari rwo rwego rwa mbere muri Afurika.

Nkuko bitangazwa n'ishyirahamwe mpuzamahanga ry'umukino wo gusiganwa ku magare UCI, amakipe yitabira iryo rushanwa aba ari amakipe yabigize umwuga gusa n'amakipe y'ibihugu.

Imitegurire y'iryo rushanwa irahinduka kandi ibihembo bitangwa ku bakinnyi batsinze bikikuba inshuro zirenze 2.