Mu Buhinde bagiye kujya barebera umupira w'amaguru wa Espanye kuri Facebook

Aya masezerano azatuma Facebook yerekana imikino yose 380 ya La Liga Uwufise ububasha kw’isanamu Getty Images
Image caption Aya masezerano azatuma Facebook yerekana imikino yose 380 ya La Liga

Guhera ku wa gatanu, mu Buhinde bazaba bafite uburyo bumwe gusa bwo kureba shampiyona ya Espanye y'umupira w'amaguru: ku rubuga nkoranyambaga rwa Facebook.

Uru rubuga nkoranyambaga rwagiranye amasezerano y'imyaka itatu na shampiyona ya Espanye izwi nka La Liga.

Facebook yonyine izajya yerekana buri mukino wa La Liga ku bantu baba mu Buhinde, Afghanistani, Bangladesh, Bhutani, Nepali, The Maldives, Sri Lanka na Pakistani. Ni uburenganzira bwari busanzwe bufitwe na Sony Pictures Network.

Ibikubiye muri aya masezerano mashya ntabwo byatangajwe.

Ariko nkuko bitangazwa n'ibiro ntaramakuru Reuters, ubwo ubu burenganzira bwo kwerekana imikino ya shampiyona ya La Liga bwaherukaga kugurwa mu mwaka wa 2014, bwaguzwe miliyoni 32 z'amadolari y'Amerika.

Muri ibi bice Facebook igiye kujya yerekanamo imikino ya La Liga, hari abantu miliyoni 348 bakoresha uru rubuga. Muri bo, miliyoni 270 baba mu Buhinde.

Avugana n'ibiro ntaramakuru Reuters, Peter Hutton, umuyobozi wa Facebook ushinzwe ibikorwa byo kwerekana imikino ku isi mu gihe iri kuba, yavuze ko ku ikubitiro nta matangazo yo kwamamaza azajya yerekanwa kuri Facebook muri iyo mikino ya La Liga.

Ariko yavuze ko hari gutekerezwa ku buryo bwiza cyane bwo kubikora mu gihe kiri imbere.

Yongeyeho ati:

"Ibi ntibizabangamira amasheni ya televiziyo yari asanzwe yerekana iyi mikino.

Uwufise ububasha kw’isanamu Reuters
Image caption Abantu miliyoni 270 bakoresha Facebook mu Buhinde

Ariko amasheni ya televiziyo yo birashoboka ko yo atazabyumva gutyo.

Guhitisha imikino mu gihe iri kuba bisanzwe ari byo by'ingenzi biyazanira abafatabuguzi.

Aya masezerano ya Facebook na shampiyona ya La Liga ajyanye n'ibintu bikomeje kwaduka ku isi.

Mu Bwongereza, uyu mwaka w'imikino ya Premiere League uzaba ari wo wa nyuma buri mukino w'iyi shampiyona werekanywe uri kuba kuri televiziyo.

Mu mwaka utaha, imikino 20 izerekanwa gusa kuri interineti ku rubuga rwa Amazon.