Abafana bo mu Misiri bagiye kwemererwa kongera kurebera umupira w'amaguru ku bibuga

Abafana 74 b'ikipe ya Al Ahly bapfiriye mu mukino wayihuzaga n'ikipe ya Al Masry ku kibuga cya Port Said mu mwaka wa 2012 Uwufise ububasha kw’isanamu Getty Images
Image caption Abafana 74 b'ikipe ya Al Ahly bapfiriye mu mukino wayihuzaga n'ikipe ya Al Masry ku kibuga cya Port Said mu mwaka wa 2012

Ashraf Sobhy, Minisitiri w'imikino mu Misiri, yavuze ko abafana bagiye kongera kurebera ku bibuga mu buryo buhoraho imikino ya shampiyona y'umupira w'amaguru - ku nshuro ya mbere kuva mu mwaka wa 2012.

Mu kwezi kwa kabiri mu mwaka wa 2012, abafana bari babujijwe kongera kugera ku bibuga by'umupira w'amaguru nyuma yaho abafana 74 b'ikipe ya Al Ahly bapfiriye mu mukino wayihuzaga n'ikipe ya Al Masry ku kibuga cya Port Said.

Byitezwe ko abafana bazongera kurebera imikino ku bibuga guhera ku itariki ya mbere y'ukwezi gutaha kwa cyenda, ariko ku ikubitiro abafana batarenze ibihumbi 5 ni bo bazajya bemererwa kugera ku kibuga.

Kuva mu mwaka wa 2012, umubare muto w'abafana ni wo wemererwa kurebera imikino y'umupira w'amaguru ku bibuga, nabwo mu mikino imwe n'imwe.

Iyi mikino irimo imikino ihuza ikipe y'igihugu ya Misiri n'ibindi bihugu ndetse n'imwe ihuza amakipe yo mu Misiri n'andi makipe mu marushanwa yo ku rwego rw'Afurika.

Mu mwaka wa 2015, hari hateganyijwe ko abafana batangira kongera kwemererwa kugera ku bibuga ariko icyo gihe abafana 22 ba Zamalek bapfiriye mu muvundano muri umwe mu mikino ya mbere wari ubaye hari abafana ku kibuga, bituma abafana bongera gucibwa ku bibuga.

Mu cyumweru gishize, Minisitiri Sobhy yagiranye inama n'abayobozi b'amakipe bafata umwanzuro utegereje kwemezwa bwa nyuma na Minisitiri w'ubutegetsi bw'igihugu.

Ibindi bisa n’ibi