Manchester City yatangaje ko Kevin de Bruyne agiye kumara amezi atatu adakina

Kevin de Bruyne yabaye umukinnyi wahize abandi muri Manchester City mu mwaka ushize w'imikino

Ahavuye isanamu, PA

Insiguro y'isanamu,

Kevin de Bruyne yabaye umukinnyi wahize abandi muri Manchester City mu mwaka ushize w'imikino

Manchester City yatangaje ko umukinnyi wayo wo hagati, Umubiligi Kevin de Bruyne, agiye kumara amezi atatu adakina kubera kuvunika ivi.

De Bruyne yinjiye mu kibuga asimbura mu gice cya kabiri mu mukino wabaye ku cyumweru ubwo Manchester City yatsindaga Arsenal 2-0.

Ku wa gatatu, yavunitse ivi ry'iburyo ari mu myitozo. Ariko ubuyobozi bwa City bwavuze ko bidakenewe ko abagwa.

Umutoza Pep Guardiola yavuze ko "kizaba igihombo gikomeye" kuri Manchester City.

De Bruyne w'imyaka 27 y'amavuko, ntiyashoboye gukina imikino 12 mu mwaka wa 2016 nyuma yo kuvunika iri vi n'ubundi yongeye kuvunika. Icyo gihe hari mu mukino City yatsinzemo Everton.

Mu mwaka ushize w'imikino, yabaye umukinnyi wahize abandi muri City, atsinda ibitego 12 atanga n'imipira 21 yavuyemo ibitego.

Mu gikombe cy'isi giheruka kubera mu Burusiya muri uyu mwaka wa 2018, yafashije Ububiligi kwegukana umwanya wa gatatu - umwanya mwiza Ububiligi bwari bugezeho mu mateka yabwo y'umupira w'amaguru.