Imyigaragambyo irashoboka ku bakinnyi bo muri La Liga "barakajwe" no gukinira muri Amerika

Abakinnyi bahagarariye abandi bo muri La Liga bifotoje nyuma y'inama yabaye ku wa gatatu
Insiguro y'isanamu,

Abakinnyi bahagarariye abandi bo muri La Liga bifotoje nyuma y'inama yabaye ku wa gatatu

Ishyirahamwe ry'abakinnyi b'umupira w'amaguru muri shampiyona ya Espanye izwi nka La Liga, ryatangaje ko no kwigaragambya bishoboka kubera icyemezo cyafashwe cyo gukinira umukino wa La Liga muri Leta Zunze Ubumwe z'Amerika.

Sergio Ramos, kapiteni wa Real Madrid, na Sergio Busquets, kapiteni wungirije wa Barcelona, bari mu bitabiriye inama yabaye ku wa gatatu ihuriyemo abakapiteni n'abahagarariye amakipe 20 yo muri La Liga yigaga ku "mpungenge" icyo cyemezo kibateye.

Ku wa gatanu nibwo ubuyobozi bwa La Liga bwagiranye amasezerano y'imyaka 15 n'igitangazamakuru Relevent cyo muri Amerika.

Iri shyirahamwe rivuga ko abanyamuryango batagishijwe inama mbere yuko ayo masezerano ashyirwaho umukono.

Mu nama yabaye ku wa gatatu, abakinnyi nka Ramos na Nacho ba Real Madrid, Busquets na Sergi Roberto ba Barcelona, Leo Baptistao wa Espanyol, Bruno ukinira Villarreal na Koke na Juanfran ba Atletico Madrid, bagiranye ibiganiro na David Aganzo, perezida w'iri shyirahamwe.

Aganzo yagize ati:

"Ikibazo ni uko nta gushyira mu gaciro kwabayeho [muri ayo masezerano]. Kugurisha umupira byonyine ni byo byahawe agaciro, nta n'umwe witaye ku bafana. Ducyeneye gucyemura ibi n'abategetsi bakuru. Abakapiteni bararakaye. Bose hamwe bamagana iki cyemezo."

Yongeyeho ati:

"Ntibyumvikana. Aya ni amasezerano y'imyaka 15 yashyizweho umukono abakinnyi batagishijwe inama."

Ku bijyanye no kuba bashobora gukora imyigaragambyo, Aganzo yagize ati:

"Tuzagerageza ku buryo tutazagera kuri urwo rwego ruhanitse, ariko dufite ubushake bwo kurugeraho bibaye ngombwa."

Aganzo yavuze ko aba bakinnyi bazongera gukora inama mu kwezi gutaha kwa cyenda.