Uganda yatsindiye kwitabira imikino y'igikombe cy'Afurika cy'ibihugu cy'abari munsi y'imyaka 17 y'amavuko

Mu mikino ya kimwe cya kabiri, Uganda yari yatunguye Tanzania yakiriye iri rushanwa iyitsinda ibitego 3-1
Image caption Mu mikino ya kimwe cya kabiri, Uganda yari yatunguye Tanzania yakiriye iri rushanwa iyitsinda ibitego 3-1

Ikipe y'igihugu ya Uganda y'umupira w'amaguru yaraye ibonye itike yo kuzakina imikino y'igikombe cy'Afurika cy'ibihugu yo mu mwaka utaha wa 2019 nyuma yo gutsinda Ethiopia 3-1 mu mukino wa nyuma w'irushanwa rya CECAFA rihuza ibihugu byo mu karere ryaberaga muri Tanzania.

Ahmad, Perezida w'ishyirahamwe ry'umupira w'amaguru muri Afurika, na we ari mu barebye uwo mukino wa nyuma wabereye muri Tanzania - iki gihugu ni cyo kizanakira imikino y'umwaka utaha y'iki gikombe cy'Afurika cy'ibihugu cy'abari munsi y'imyaka 17 y'amavuko.

Samson Kasozi wa Uganda ni we wafunguye amazamu n'umutwe ku munota wa 15 mbere yuko Abdul Wahad Iddi asongamo ibindi bibiri mu gice cya kabiri cy'umukino bikaba ibitego 3-0.

Igitego cya Ethiopia cy'impozamarira yakibonye mu minota ya nyuma y'umukino gitsinzwe kuri penaliti na Wondimagegn Bunaro.

Mu mikino ya kimwe cya kabiri, Uganda yari yatunguye Tanzania yakiriye iri rushanwa iyitsinda ibitego 3-1, mu gihe Ethiopia yari yasezereye u Rwanda kuri penaliti 4-2 nyuma yaho umukino wari warangiye amakipe yombi anganya 2-2.

Tanzania - isanzwe ifite itike yo kwitabira imikino yo mu mwaka utaha kuko ari ho izabera - yatsinze u Rwanda kuri penaliti yegukana umwanya wa gatatu.

Moses Magogo, umukuru w'ishyirahamwe ry'umupira w'amaguru muri Uganda, yagize ati:

"Turishimye kuba bubaye ubwa mbere ikipe yacu y'abari munsi y'imyaka 17 y'amavuko ishoboye kubona itike yo kwitabira igikombe cy'ibihugu. Iyi tike iragaragaza ko turi gukora akazi neza mu guteza imbere urubyiruko."

Iyi tike ije ikurikira iy'ikipe y'abakuru ya Uganda, yashoboye kwongera kwitabira imikino y'igikombe cy'Afurika cy'ibihugu mu mwaka ushize wa 2017 - nyuma y'imyaka 39 yari ishize itabasha kucyitabira.

Igikombe cy'Afurika cy'ibihugu cy'abari munsi y'imyaka 17 y'amavuko kizabera muri Tanzania mu mwaka wa 2019 guhera ku itariki ya 12 kugera ku ya 26 y'ukwezi kwa gatanu.

Amakipe ane ya mbere azahita abona itike yo kwitabira imikino y'igikombe cy'isi muri icyo cyiciro izabera muri Peru mu kwezi kwa cumi k'umwaka uzakurikira wa 2020.