Leroy Sane yatangaje ko umuryango we wibarutse umukobwa nyuma yo kuva mu ikipe y'Ubudage

Leroy Sane yinjiye mu kibuga ku munota wa 83 asimbuye mu mukino wa gicuti wahuje Ubudage n'Ubufaransa ku wa kane Uwufise ububasha kw’isanamu Getty Images
Image caption Leroy Sane yinjiye mu kibuga ku munota wa 83 asimbuye mu mukino wa gicuti wahuje Ubudage n'Ubufaransa ku wa kane

Leroy Sane, umukinnyi wo ku ruhande wa Manchester City, yatangaje ko umuryango we wibarutse umwana w'umukobwa - hashize umunsi umwe avuye muri hoteli icumbikiye ikipe y'igihugu y'Ubudage "ku mpamvu ze bwite".

Kuri uyu wa gatandatu yagize ati:

"Nshimishijwe cyane no kubamenyesha ko twibarutse umwana w'umukobwa mu ijoro ryacyeye."

Ubwo yatangazaga iyo nkuru ku mbuga nkoranyambaga, Sane yavuze ko "ashimira cyane" ubuyobozi bw'ikipe y'igihugu y'Ubudage bwamwemereye kuba avuye mu myitozo y'iyi kipe ngo abe hamwe n'umuryango we.

Sane w'imyaka 22 y'amavuko, ntabwo yari mu ikipe y'igihugu y'Ubudage yakinnye mu mikino y'igikombe cy'isi cy'uyu mwaka cyabereye mu Burusiya.

Ariko yakinnye igihe gito asimbuye mu mukino wo ku wa kane w'ibihugu byo mu mpuzamashyirahamwe y'umupira w'amaguru i Burayi, Uefa, wahuje Ubudage n'Ubufaransa ukarangira amakipe yombi anganya 0-0.

Ku wa gatanu, ubuyobozi bw'ikipe y'igihugu y'Ubudage bwanyujije ubutumwa ku rubuga nkoranyambaga rwa Twitter buvuga ko nyuma y'ibiganiro n'umutoza mukuru Joachim Low, "Leroy Sane yavuye muri hoteli y'i Munich [icumbikiye iyi kipe] ku mpamvu ze bwite."

Bwongeyeho ko atazakina umukino wa gicuti na Peru uzaba ku cyumweru.

Ibyo byabaye hashize iminsi mugenzi we Toni Kroos bakinana mu ikipe y'igihugu y'Ubudage, avuze ko Sane - umaze gukinira ikipe y'igihugu y'Ubudage imikino 13 - adakina bingana n'ubushobozi bwe kandi ko agomba kuvugurura imyitwarire ye.

Sane waguzwe miliyoni 37 z'amapawundi n'imisago ubwo yageraga muri Manchester City mu kwezi kwa munani mu mwaka wa 2016 avuye mu ikipe ya Schalke, nta mukino wa Manchester City arabanzamo mu kibuga muri uyu mwaka w'imikino.

Ntabwo yari mu ikipe y'abakinnyi 18 mu mukino wa vuba cyane uheruka wa shampiyona Manchester City yatsinzemo Newcastle 2-1 ku itariki ya mbere y'uku kwezi kwa cyenda, nubwo bwose umutoza Pep Guardiola yahakanye amakuru yavugaga ko adashimishijwe n'imyitwarire y'uyu mukinnyi.