Gianni Infantino, umukuru wa FIFA, yasezeranyije gushyigikira kurushaho umupira w'abari n'abategarugori

Umukuru wa FIFA, Gianni Infantino, mu kiganiro n'abanyamakuru i Kigali ku wa gatanu Uwufise ububasha kw’isanamu Getty Images
Image caption Umukuru wa FIFA, Gianni Infantino, mu kiganiro n'abanyamakuru i Kigali ku wa gatanu

Inama nyobozi y'ishyirahamwe ry'umupira w'amaguru ku isi, FIFA, yateraniye i Kigali mu Rwanda ku wa gatanu yemeje gushyigikira kurushaho umupira w'abari n'abategarugori yongera inkunga yahabwaga uru rwego.

Icyemezo cya FIFA kivuze ko igiye kujya ishyira miliyoni 50 z'amadolari y'Amerika mu gutegura amarushanwa y'abagore.

Amashyirahamwe 24 akina igikombe cy'isi nayo azajya ahabwa inkunga yo mu rwego rw'imari yo gutegura ndetse no kwitabira amarushanwa.

Umukuru wa FIFA Gianni Infantino yavuze ko ibihembo ku ikipe yatwaye igikombe bigiye kuzamurwa bikikuba kabiri bikagera kuri miliyoni 30 z'amadolari y'Amerika.

FIFA kandi yemeye ko izajya itanga inkunga y'amafaranga ku makipe azemera kurekura abakinnyi bayo ngo bitabire amarushanwa y'abagore.

Inama y'i Kigali yanemeje ishingwa ry'akanama ko kwiga uko igikombe cy'isi cy'amakipe cyavugururwa.

Byari byitezwe ko umwanzuro ufatirwa muri iyi nama ariko ntibyashobotse kubera ahanini ko ibihugu bigize ishyirahamwe ry'umupira w'amaguru mu Burayi (UEFA) byagaragaje ko bitishimiye izi mpinduka.

Avuga kuri iki kibazo, umukuru wa FIFA Gianni Infantino yagize ati:

"Hari abari bashyigikiye iki gitekerezo ariko hari n'abandi bakirwanyaga kandi ibyo ni ibisanzwe."

"Nta mwanzuro uhamye twagezeho uyu munsi [ku wa gatanu], gusa igishimishije ni uko bigaragara ko hari benshi bifuza impinduka."

Inama nyobozi ya FIFA yavuze no ku mugambi w'ishyirahamwe rya Espagne wo kujyana imwe mu mikino ya shampiyona gukinirwa muri Leta Zunze Ubumnwe z'Amerika.

Kuri iki kibazo, FIFA yavuze ko hagomba kubahirizwa ihame ry'uko imikino yose ya shampiyona igomba kubera mu mbibi za buri gihugu.