Santiago Solari, umutoza w'inzibacyuho wa Real Madrid, avuga ko icyeneye gukomeza umutsi

Santiago Solari (ibumoso) ku wa kabiri yayoboye bwa mbere imyitozo y'ikipe ya Real Madrid Uwufise ububasha kw’isanamu AFP
Image caption Santiago Solari (ibumoso) ku wa kabiri yayoboye bwa mbere imyitozo y'ikipe ya Real Madrid

Santiago Solari, umutoza w'inzibacyuho wa Real Madrid, yavuze ko iyi kipe icyeneye gukomeza umutsi ubwo azaba ayitoza mu mukino we wa mbere ku wa gatatu.

Julen Lopetegui wari umutoza w'iyi kipe, yirukanwe ku wa mbere nyuma yaho Real Madrid ku cyumweru inyagiwe na mucyeba Barcelona ibitego 5-1, bigatuma Real Madrid ijya ku mwanya wa cyenda ku rutonde rw'agateganyo rwa shampiyona ya La Liga yo muri Espanye.

Yahise rero "asimburwa by'agateganyo" n'uyu Solari ukomoka muri Argentine, wari usanzwe ari umutoza w'ikipe ya kabiri ya Real Madrid izwi nka Castilla.

Solari w'imyaka 42 y'amavuko wahoze ari umukinnyi wa Real Madrid ukina ku ruhande, azatoza umukino we wa mbere ku wa gatatu ubwo Real Madrid izaba ikina n'ikipe ya Melilla mu mikino y'igikombe Copa del Rey.

Mu kiganiro n'abanyamakuru, Solari yagize ati:

"Abakinnyi barakomeretse gacye [ku mutima], ariko barashaka rwose guhindura ibintu".

"Iyi ni ikipe y'abatwara ibikombe, y'indwanyi, y'abakinnyi bakoreye iyi kipe ibintu byinshi".

"Ibihe bimwe biba bikomeye kurusha ibindi, kandi icyo ni cyo gihe ubona gukomeza umutsi kw'aba bakinnyi".

Solari yavuze ko kuri ubu adashishikajwe no kumenya niba bishobora kurangira agizwe umutoza w'iyi kipe.

Yagize ati:

"Ngiye gukorana umutima mwiza, nkore ibyo nshoboye byose".

"Ni umwanya mwiza cyane, ni ikipe ikomeye cyane, kandi ibi si ibintu ndikuvuga ubu kuko nagizwe umutoza [w'inzibacyuho] w'iyi kipe. Nari nsanzwe hari ibindi nakoze muri iyi kipe - narayikiniye, nabize icyuya nambaye umwambaro y'iyi kipe".

"Madrid ni ikipe ituruta twese ariko idukora ku mutima twese kubera ukuntu ikomeye cyane kandi ndashaka kuba muri iyi kipe".

'Nta n'umwe wakwigereranya na Zizou'

Uwufise ububasha kw’isanamu AFP
Image caption Solari (ibumoso) ni we watangiye atera umupira Zidane yaje gutsindamo igitego cy'intsinzi cya Real Madrid mu mukino wa nyuma wa Champions League mu mwaka wa 2002

Lopetegui, wirukanwe ku wa mbere, yari yasimbuye Zinedine Zidane, wahoze ari umukinnyi w'ikipe y'igihugu y'Ubufaransa ndetse wanakiniye Real Madrid.

Zidane yasezeye muri iyi kipe mu kwezi kwa gatanu uyu mwaka, amaze kuyifasha gutsindira igikombe cya Champions League inshuro eshatu zikurikiranya.

Zidane w'imyaka 46 y'amavuko, yakinanye na Solari muri Real Madrid hagati y'umwaka wa 2001 na 2005, bombi bakaba barakuwe mu gutoza ikipe ya kabiri bagahabwa gutoza ikipe nkuru ya Real Madrid.

Solari yagize ati:

"Zinedine Zidane ni umwe mu bintu bikomeye cyane twagize muri iyi kipe".

"Amagambo yose watekereza ntabwo yaba ahagije ngo usobanure Zizou. Ni umuntu ucisha macye cyane, ni umutoza ukomeye cyane kandi nta muntu n'umwe wakwigereranya na we".