Usain Bolt yasezeye mu ikipe ya Central Coast Mariners yo muri Australia

Bolt (iburyo) mu mukino wa gicuti ubanziriza shampiyona ubwo ikipe yakiniraga ya Central Coast Mariners yakinaga na Macarthur South West United Uwufise ububasha kw’isanamu Getty Images
Image caption Bolt (iburyo) mu mukino wa gicuti ubanziriza shampiyona ubwo ikipe yakiniraga ya Central Coast Mariners yakinaga na Macarthur South West United

Gukina umupira w'amaguru mu buryo bw'igeragezwa mu ikipe ya Central Coast Mariners yo mu cyiciro cya mbere muri Australia kwa Usain Bolt, kwarangiye.

Bolt w'imyaka 32 y'amavuko ukomoka muri Jamaica watwaye imidari umunani mu marushanwa ya Olympique mu gusigwa ku maguru, yari yageze muri iyi kipe mu kwezi kwa munani uyu mwaka.

Byari byatangajwe ko azayikinira "byo kwitoza mu gihe kitazwi iherezo".

Avuye muri iyi kipe ayitsindiye ibitego bibiri mu mukino wa mbere yakinnye wari uwa gicuti.

Ariko nta mukino yari yagakinnye muri iyo kipe kuva shampiyona yatangira.

Kuri uyu wa gatanu, ubuyobozi bw'ikipe Central Coast Mariners bwatangaje ko kugerageza kubona "igisubizo kijyanye n'ubucuruzi" cyo gutuma Bolt aguma muri iyi kipe, ntacyo byagezeho.

Mu kwezi gushize kwa cumi, ubuyobozi bw'iyi kipe bwari bwatangaje ko bwari bwamugejejeho icyifuzo cya kontaro igabanyijemo ibice "bijyanye n'umupira w'amaguru" ndetse n'"ubucuruzi". Ariko iyo kontaro yajyaga kubahirizwa habonetse inkunga y'"undi muntu".

Iyi kipe rero yatangaje ko nubwo bwose yagiye igirana inama n'abantu benshi bashoboraga kuvamo abaterankunga, "nta masezerano" yashoboye gushyirwaho umukono.

Uwufise ububasha kw’isanamu Getty Images
Image caption Bolt yesheje imihigo y'isi mu gusiganwa ku maguru mu ntera ya metero 100 na metero 200

Mike Charlesworth, nyir'iyi kipe yo muri Australia, yashimiye Bolt ku byumweru umunani yari amaze muri iyi kipe mu buryo bw'igeragezwa, avuga ko icyo gihe cyagenze neza.

Yagize ati:

"Yahise yiyumva mu ikipe neza cyane ndetse agera kuri byinshi nk'umukinnyi w'umupira w'amaguru".

Bolt wesheje imihigo y'isi mu gusiganwa ku maguru mu ntera ya metero 100 na metero 200, yavuze ko afite "inzozi" zo gukina umupira w'amaguru mu buryo bw'ababigize umwuga.

Kuri uyu wa gatanu, Bolt yagize ati:

"Nifuzaga gushimira ba nyir'ikipe ya Central Coast Mariners, ubuyobozi, abakozi, abakinnyi n'abafana bamfashije kwiyumvamo ko nisanga muri iyi kipe mu gihe nari maze aha".

Bolt yasezeye ku gusiganwa ku maguru mu mwaka ushize wa 2017.

Mu bihe byashize, yakoreye imyitozo yo gukina umupira w'amaguru mu makipe ya Borussia Dortmund yo mu Budage, Mamelodi Sundowns yo muri Afurika y'epfo na Stromsgodset yo muri Norvège.

Ibindi bisa n’ibi