Arsenal ihangayikishijwe n'imvune "ikomeye cyane" ya Danny Welbeck

Danny Welbeck Uwufise ububasha kw’isanamu Reuters

Arsenal ifite ubwoba ko rutahizamu Danny Welbeck yaba "yavunitse bikomeye" nyuma yaho akuwe mu kibuga mu ngobyi ubwo ikipe ye yanganyaga na Sporting Lisbon ku wa kane mu mukino w'irushanwa rya Europa League.

Uyu mukino waberaga ku kibuga Emirates cya Arsenal, warangiye amakipe yombi anganya 0-0, Arsenal ibona ityo itike yo gukomeza muri iri rushanwa.

Ariko uyu mukino wakomwe mu nkokora n'imvune yo ku kagombambari ya Welbeck w'imyaka 27 y'amavuko.

Umutoza Unai Emery wa Arsenal yagize ati:

"Ari mu bitaro. Amakuru ahari ni uko tugiye gutegereza, ariko turatekereza ko ari imvune ikomeye cyane".

"Buri mvune iba itandukanye n'iyindi. Ushobora gusanga hari ikintu cyavunitse mu kagombambari".

Uwufise ububasha kw’isanamu Reuters
Image caption Henrikh Mkhitaryan, umukinnyi wo hagati wa Arsenal, areba imvune ya mugenzi we Welbeck

Yongeyeho ati:

"Ni imvune ikomeye kuri kuri we, kuri twe, ku bantu bose bamukunda".

Welbeck yavunitse ku munota wa 25 w'umukino ubwo yasimbukaga ashaka gutera umupira n'umutwe, akagwa nabi agwira akagombambari ke k'iburyo.

Uwufise ububasha kw’isanamu Getty Images
Image caption Umunya-Espanye Unai Emery (iburyo) yatangiye gutoza Arsenal mu kwezi kwa gatanu uyu mwaka, asimbuye Umufaransa Arsène Wenger

Bamwe mu bakinnyi wa Arsenal bagaragaye nk'abahungabanyijwe n'imvune ya Welbeck.

Umutoza Emery yagize ati:

"Babibonaga ko ari imvune ikomeye".

Uwufise ububasha kw’isanamu Getty Images
Image caption Danny Welbeck ni we watsinze igitego cyo ku munota wa 77 mu mukino ubanza Arsenal yatsinzemo Sporting Lisbon 1-0 ku itariki ya 25 y'ukwezi gushize kwa cumi

Martin Keown, wahoze akina nka myugariro wa Arsenal ariko kuri ubu akaba asigaye ari umusesenguzi mu gitangazamakuru BT Sport, yavuze ko "bisa nkaho [Welbeck] azamara igihe adakina".

Welbeck yatsinze ibitego bitanu muri uyu mwaka w'imikino.

Yakiniye Ubwongereza mu mukino wabuhuje na Espanye mu kwezi kwa cyenda, ndetse yari yashyizwe ku rutonde rw'abakinnyi umutoza Gareth Southgate w'Ubwongereza ateganya kwifashisha mu mukino wa gicuti na Leta Zunze Ubumwe z'Amerika no mu w'ibihugu by'i Burayi uzahuza Ubwongereza na Croatia.