Ku myaka 40 y'amavuko, Didier Drogba yasezeye ku mupira w'amaguru

Akina muri Chelsea, Drogba yatsindiye ibikombe birimo bine bya Premier League, bine bya FA Cup n'igikombe cya Champions League Uwufise ububasha kw’isanamu Getty Images
Image caption Akina muri Chelsea, Drogba yatsindiye ibikombe birimo bine bya Premier League, bine bya FA Cup n'igikombe cya Champions League

Didier Drogba wabaye ikirangirire mu mupira w'amaguru akaba na rutahizamu w'ikipe y'igihugu ya Côte d'Ivoire na Chelsea, yemeje ko yasezeye ku gukina umupira w'amaguru, asoza atyo "imyaka 20 yabaye myiza cyane" yamaze akina umupira w'amaguru.

Drogba w'imyaka 40 y'amavuko, yakiniye Chelsea mu bihe bibiri bitandukanye, ayitsindira ibitego 164 mu mikino 381 ndetse ayifasha gutwara igikombe cya Premier League inshuro enye n'icya Champions League cyo mu mwaka wa 2012.

Amezi 18 ashize yayamaze akinira ikipe ya Phoenix Rising yo muri Leta Zunze Ubumwe z'Amerika, akaba ari n'umwe muri ba nyir'iyi kipe.

Yabwiye ikiganiro Sportshour cya BBC ati:

"Nyuma y'imyaka 20, nafashe icyemezo cyo gusezera ku gukina umupira w'amaguru".

Byari byitezwe ko Drogba yasezera ku mupira w'amaguru nyuma y'umukino wa nyuma wa shampiyona yo muri Amerika yo mu cyiciro cya kabiri wabaye mu ntangiriro y'uku kwezi kwa cumi na kumwe, umukino we wa nyuma ikipe ye ikawutsindwa ku gitego 1-0 na Louisville City.

Yagize ati:

"Ni uburyo bwiza bwo gusezera, bwo gufasha guteza imbere bamwe mu bakiri bato bafite impano".

Uwufise ububasha kw’isanamu Getty Images
Image caption Didier Drogba atsinda igitego cya mbere cya Chelsea mu mukino wa nyuma wa Champions League wayihuzaga na FC Bayern Muenchen ku kibuga cya Fussball Arena München, ku itariki ya 19 y'ukwezi kwa gatanu mu mwaka wa 2012

"Kwitura ineza nagiriwe nkayitura umupira w'amaguru, ni cyo kintu cyiza cyane kurusha ibindi cyo gusorezaho nigiye cyane mu mupira w'amaguru".

Ku myaka 23 y'amavuko, ni bwo Drogba yatangiye gukina umupira w'amaguru mu makipe yo ku rwego rwo hejuru.

Icyo gihe yahawe kontaro n'ikipe ya Guingamp yo mu Bufaransa, imukuye mu ikipe ya Le Mans yo muri shampiyona y'icyiciro cya kabiri, hari mu kwezi kwa mbere mu mwaka wa 2002.

Amezi 18 nyuma yaho, yageze mu ikipe ya Marseille, nuko mu mwaka wakurikiyeho agera muri Chelsea, amakuru akavuga ko yaguzwe miliyoni 24 z'amapawundi.

Ni no muri Chelsea yagiriye ibihe byiza cyane mu gihe yamaze akina umupira w'amaguru nk'uwabigize umwuga.