Sadio Mane yongereye kontaro yo gukinira Liverpool kugera mu mwaka wa 2023

Mane amaze gutsindira Liverpool ibitego 7 muri uyu mwaka w'imikino Uwufise ububasha kw’isanamu Getty Images
Image caption Mane amaze gutsindira Liverpool ibitego 7 muri uyu mwaka w'imikino

Rutahizamu Sadio Mane w'ikipe y'igihugu ya Senegali na Liverpool, yemeye kongera kontaro ye akinira ikipe ya Liverpool.

Sadio w'imyaka 26 y'amavuko, yageze muri iyi kipe mu mwaka wa 2016 avuye mu ikipe ya Southampton aguzwe miliyoni 34 z'amapawundi, yemera kuyikinira mu gihe cy'imyaka itanu.

Kuva icyo gihe, amaze gukinira iyi kipe itozwa n'Umudage Jurgen Klopp imikino 89 mu marushanwa yose hamwe, ayitsindira ibitego 40.

Sadio yagize ati:

"Nishimiye cyane kongera kontaro yanjye yo gukinira Liverpool. Ni umunsi ukomeye kuri jye kandi iki ni icyemezo cyiza cyane kurusha ibindi nafashe mu buzima bwanjye nk'umukinnyi".

Ibiganiro byo kongera kontaro ye akinira iyi kipe byatangiye mu mpera y'umwaka ushize w'imikino. Byemezwa ko izagera mu mwaka wa 2023.

Yongeyeho ati:

"Mfitiye amashyushyu ikintu cyose - gufasha ikipe, gufasha ikipe kugera ku nzozi zacu, cyane cyane gutwara ibikombe".

"Nkuko namye mbivuga igihe cyose, ubwo namenyaga ko nagize amahirwe yo kuza hano [muri Liverpool], sinigeze mbishidikanyaho. Ni ikipe ikwiye mu gihe gikwiye, ifite n'umutoza ukwiye. Nageze hano kandi narishimye cyane".

Uwufise ububasha kw’isanamu Getty Images
Image caption Umutoza Klopp avuga ko kuri ubu nta kipe y'i Burayi n'imwe itakwifuza umukinnyi nka Sadio

Umutoza Klopp yagize ati:

"Nta kipe n'imwe ntekereza i Burayi itakwifuza umukinnyi nka Sadio, rero kuba ashaka kugumana natwe hari icyo bivuze ku rwego tugezeho kuri ubu".

"Yongeyeho ati:

"Ni umuntu w'ingenzi cyane mu ikipe yacu. Atanga ibyishimo kandi ntekereza ko bigaragarira no mu mikinire ye n'umusanzu we mu kibuga".

"Ikintu kimwe gusa nanenga Sadio nuko wenda hari igihe we ubwe aba ari we gusa utamenya ukuntu ari umukinnyi mwiza - ariko nka rutahizamu, ni umukinnyi wujuje ibisabwa byose".

Iyi kontaro Sadio yongereye muri Liverpool mu buryo bw'igihe kirekire, ije ikurikira iza bagenzi be Roberto Firmino wemeye gukomeza gukinira iyi kipe mu kwezi kwa kane, ndetse na Mohamed Salah washyize umukono kuri kontaro nshya mu kwezi kwa karindwi.

Sadio yatowe nk'umukinnyi w'umwaka muri Liverpool mu mwaka wa mbere w'imikino we muri iyi kipe ndetse atsindira n'igihembo cy'ishyirahamwe ry'abakinnyi b'umupira w'amaguru by'umwuga muri uwo mwaka.

Mu mwaka ushize w'imikino, 10 mu bitego 20 yatsinze yabitsinze mu mikino ya Champions League, Liverpool iza no kugera ku mukino wa nyuma w'iryo rushanwa.

Yakiniye Senegali mu mikino y'igikombe cy'isi cyabereye mu Burusiya ku mpeshyi y'uyu mwaka, atsinda igitego kimwe mu mikino itatu yakinnye.

Aherutse gutangazwa nk'umwe mu bari ku rutonde rugufi rw'abakinnyi 30 bahatanira igihembo cya Ballon d'Or cy'uyu mwaka wa 2018, kandi ari no mu bakinnyi batanu bahatanira igihembo cya BBC cy'umukinnyi w'Umunyafurika w'umupira w'amaguru cy'uyu mwaka.