Uhagarariye Jose Mourinho avuga ko 'yishimye' kandi 'ashishikajwe n'umutima we wose' no gutoza Manchester United

Manchester United itozwa na Jose Mourinho, imaze gutsinda imikino itandatu gusa muri uyu mwaka w'imikino Uwufise ububasha kw’isanamu Getty Images
Image caption Manchester United itozwa na Jose Mourinho, imaze gutsinda imikino itandatu gusa muri uyu mwaka w'imikino

Uhagarariye umutoza Jose Mourinho wa Manchester United yavuze ko uyu mutoza "yishimye cyane" kandi "ashishikajwe n'umutima we wose" no gutoza iyi kipe.

Muri uyu mwaka w'imikino, ahazaza ha Mourinho muri iyi kipe hakomeje kwibazwaho, mu gihe iyi kipe ubu iri ku mwanya wa munani ku rutonde rw'agateganyo rwa shampiyona ya Premier League.

Mu kwezi kwa mbere ni bwo Mourinho, Umunya-Portugali w'imyaka 55 y'amavuko, yongereye kontaro ye yo gutoza iyi kipe kugera mu mwaka wa 2020. Ariko hakomeje kumvikana amakuru yuko ashobora gusubira mu ikipe ya Real Madrid yahoze atoza.

Mu itangazo Jorge Mendes uhagarariye Mourinho yasohoye, yagize ati:

"Ibyo [kuba yasubira muri Real Madrid] si ukuri na busa".

"Jose arishimye cyane muri iyi kipe kandi n'ikipe nayo iramwishimiye cyane. Afite kontaro y'igihe kirekire yo gutoza Manchester United kandi ashishikajwe n'umutima we wose n'iyi kipe mu kubaka uburyo buhamye bwo gutsinda".

Mu gihe amakuru yakomeje kuvuga ko Mourinho ashobora gusubira muri Real Madrid, hari n'andi makuru avuga ko ubuyobozi bwa Manchester United buri kwiga ku kuba bwazana umutoza Mauricio Pochettino wa Tottenham ngo abe yasimbura umutoza Mourinho.

Kuri uyu wa gatandatu, Manchester United irakira Fulham, mbere yuko ku wa gatatu w'icyumweru gitaha yerekeza ku kibuga cya Valencia yo muri Espanye mu mukino wa Champions League, nyuma ikerekeza ku kibuga Anfield cya Liverpool mu mukino wa shampiyona, ku itariki ya 16 y'uku kwezi kwa cumi na kabiri.