Usain Bolt, utarahiriwe n'umupira w'amaguru, yasezeye ku mikino burundu

Bolt yitoreje mu ikipe ya Central Coast Mariners yo muri Australia, atsinda no mu mukino wa mbere yari ayikiniye Uwufise ububasha kw’isanamu Getty Images
Image caption Bolt yitoreje mu ikipe ya Central Coast Mariners yo muri Australia, atsinda no mu mukino wa mbere yari ayikiniye

Usain Bolt watwaye imidari umunani mu mikino ya Olympique mu gusiganwa ku maguru, yavuze ko ubuzima bwe bujyanye n'imikino burangiye, nyuma yaho adahiriwe no kugerageza gutangira gukina umupira w'amaguru nk'uwabigize umwuga amaze gusezera ku gusiganwa ku maguru.

Uyu Munya-Jamaica w'imyaka 32 y'amavuko, yamaze amezi abiri yitoreza mu ikipe y'umupira w'amaguru ya Central Coast Mariners yo muri Australia.

Ariko yaje kuyivamo mu kwezi kwa cumi na kumwe k'umwaka ushize wa 2018, iyi kipe imaze kubura umuterankunga wayifasha mu guhemba Bolt mu gihe yari kuba ashyize umukono kuri kontaro yo kuyikinira.

Avuga ku gihe yamaze mu ikipe ya Central Coast Mariners, Bolt, ufite umuhigo w'isi mu gusiganwa ku maguru muri metero 100 na metero 200, yagize ati: "Byari byiza nubwo bwose bitamaze kabiri. Sinshaka kuvuga ko bititaweho uko bikwiye, ariko ntekereza ko tutabyitwayemo neza uko bikwiye".

Yongeyeho ati: "Umuntu abaho akaniga. Byampaye isomo ryiza - naryohewe cyane no kuba ndi mu ikipe byo ubwabyo".

Mu kwezi kwa cumi k'umwaka ushize wa 2018, Bolt yatsinze ibitego bibiri mu mukino wa mbere yari akiniye Central Coast Mariners. Hari mu mukino wa gicuti wayihuje na Macarthur South West, yishimira ibyo bitego mu buryo bumwe bw'umurabyo nkuko yajyaga abigenza mu gusiganwa ku maguru.

Iyi kipe ya Central Coast Mariners ikina mu cyiciro cya mbere muri Australia, si yo yonyine yashakaga kuba yagura Bolt ngo ayikinire.

Bolt yanze gukinira ikipe ya Valletta yo muri Malta, amakuru akavuga ko iyi kipe yananiwe kumuha umushahara yifuzaga guhembwa.

Yanamaze igihe yitoreza mu ikipe ya Stromsgodset yo muri Norvège no mu ikipe ya Borussia Dortmund yo mu Budage.

Bolt wasezeye ku gusiganwa ku maguru mu mwaka wa 2017, ubu noneho avuga ko agiye kwibanda ku bikorwa bitandukanye by'ubucuruzi.

Yagize ati: "Ubu ngiye mu bintu binyuranye, hari ibintu byinshi nteganya, rero nkuko njya mbivuga, ndimo kwibira muri buri kintu cyose ngerageza ubu kuba umucuruzi".