Umutoza Pochettino wa Tottenham asaba ko videwo zunganira abasifuzi ziba ziretse gukoreshwa muri Premier League

Pochettino avuga ko afite impungenge ko uburyo bwa VAR bwatuma umupira w'amaguru ubihira abafana Uwufise ububasha kw’isanamu Getty Images
Image caption Pochettino avuga ko afite impungenge ko uburyo bwa VAR bwatuma umupira w'amaguru ubihira abafana

Umutoza Mauricio Pochettino waTottenham asaba ko ikoreshwa ry'uburyo bwa videwo bwunganira umusifuzi mu gihe havutse urujijo ku ikosa rikozwe buzwi nka VAR, bwaba butindijwe gukoreshwa muri shampiyona y'icyiciro cya mbere y'umupira w'amaguru mu Bwongereza, Premier League.

Pochettino, Umunya-Argentine w'imyaka 46 y'amavuko, avuga ko ubwo buryo bwakoreshwa ari uko bumaze kunozwa.

Byitezwe ko uburyo bwa VAR butangira gukoreshwa mu mwaka utaha w'imikino muri shampiyona y'umupira w'amaguru mu Bwongereza no mu irushanwa rya Champions League.

Ni nyuma yuko ubu buryo bumaze gukoreshwa muri uyu mwaka w'imikino mu mikino imwe n'imwe mu Bwongereza.

Ikipe ya Tottenham yatsinze Chelsea igitego 1-0 mu mukino wa mbere wa kimwe cya kabiri mu gikombe cya Carabao, kivuye kuri penaliti yari itanzwe umusifuzi amaze kwifashisha uburyo bwa videwo bwa VAR.

Pochettino yagize ati: "Iyo urebye buri mukino i Burayi kuri ubu, nta muntu n'umwe wishimye".

"Ndabibasezeranyije, nta numwe! Ikintera impungenge ho gato ni uko hagiye kubaho igihe umupira w'amaguru uzatangira kubihira abafana".

"Uyu mukino ni ingenzi cyane ku bafana bacu - abafana b'umupira w'amaguru. Bagomba kwishima. Niba uhagaritse umukino ho iminota itanu ngo hafatwe icyemezo, sinzi uko [abafana] bazitwara".

Uwufise ububasha kw’isanamu EPA
Image caption Rutahizamu Harry Kane yinjiza penaliti yatanzwe hifashishijwe uburyo bwa VAR, yari iya 21 yinjije muri 25 amaze guterera Tottenham

Ariko Pochettino, nyuma y'umukino wa mbere wa kimwe cya kabiri mu gikombe cya Carabao ikipe ye yatsinzemo Chelsea kuri penaliti yatewe na rutahizamu Harry Kane ku kibuga Wembley, yavuze ko atishimiye gutsinda uwo mukino muri ubwo buryo.

Yongeyeho ati: "Kuri jye, ntekereza ko ari igitekerezo cyiza gutinza umukino kuko niba tudafite amakuru yose kandi tutazi uko biza kugenda cyangwa uko twanoza kurushaho ubu buryo, byaba byiza kurushaho dutegereje umwaka umwe cyangwa urenga".

"Kuri ubu shampiyona ya Premier League ni yo itanga ibyishimo cyane kurusha izindi ku isi, wenda hamwe na NFL na NBA muri Leta Zunze Ubumwe z'Amerika. Ariko ni impamo ni yo itanga ibyishimo cyane kurusha izindi i Burayi cyangwa mu mupira w'amaguru".

"Rero dukwiye kwitondera ubu buryo n'ukuntu twabukoresha".