Monaco yirukanye Thierry Henri, wari ubaye umutoza bwa mbere, yongera guha akazi Leonardo Jardim

Jardim (ibumoso) yongeye kugirwa umutoza wa Monaco nyuma yo kwirukanwa kwa Henri Uwufise ububasha kw’isanamu Getty Images
Image caption Jardim (ibumoso) yongeye kugirwa umutoza wa Monaco nyuma yo kwirukanwa kwa Henri

Thierry Henri yavuze ko yakiranye n'"akababaro kenshi" iyirukanwa rye nk'umutoza wa Monaco, mu gihe iyi kipe yo mu Bufaransa yongeye guha akazi k'ubutoza Leonardo Jardim yari yasimbuye.

Ku wa kane ni bwo Monaco yirukanye Henri kuri aka kazi - kari ko ka mbere akoze nk'umutoza - mu gihe iyi kipe ubu iri ku mwanya ubanziriza uwa nyuma ku rutonde rw'agateganyo rwa shampiyona y'umupira w'amaguru y'icyiciro cya mbere izwi nka Ligue 1.

Mu itangazo ikipe ya Monaco yasohoye isobanura impamvu yongeye guha akazi umutoza Jardim w'imyaka 44 y'amavuko, yavuze ko iyirukanwa rye ryabaye mu kwezi kwa cumi k'umwaka ushize wa 2018 ryari "rihutiyeho".

Vadim Vasilyev, visi-perezida w'iyi kipe, yagize ati: "Leonardo yagakwiye kuba yarahawe amahirwe yo gukomeza [gutoza]".

"Tugomba kwemera ko mu gihe cy'igura n'igurisha ry'abakinnyi ku mpeshyi, twagurishije abakinnyi benshi cyane b'ingenzi kandi, nubwo twashoye amafaranga menshi, habaye amakosa mu gushaka abo kubasimbura".

"Ibi byatumye tudashobora guhanga ikipe nshya ishoboye guhatana. Icyemezo cyo kwirukana Leonardo Jardim nacyo cyahutiyeho".

"Thierry Henri ni icyatwa mu mupira w'amaguru, ariko uruhurirane rw'ibintu bitamuturutseho, birimo, ku isonga, imvune nyinshi z'abakinnyi, byamukomye mu nkokora bituma adashobora guhita ayobora neza ikipe ngo ayikure mu bihe bikomeye".

Visi-perezida Vasilyev yongeyeho ko yizeye ko abakinnyi bazisuganya babifashijwemo n'umutoza Jardim, bagashobora gukura iyi kipe mu bihe bikomeye irimo.

'Akababaro kenshi'

Ubuyobozi bwa Monaco bwavuze ko Henri yari agicyeneye igihe ngo abashe gushyira mu bikorwa ingamba yari afite, ariko ko bwagombaga "gufata icyemezo nta gutinzamo".

Monaco yamaze kugura Naldo, myugariro ukomoka muri Brezili, imukuye mu ikipe ya Schalke, na myugariro w'Umufaransa Fode Toure, imuvanye mu ikipe ya Lille, ndetse na Cesc Fabregas, umukinnyi w'Umunya-Espanye ukina hagati mu kibuga, yakuye mu ikipe ya Chelsea.

Ariko gutsindwa ibitego 5-1 n'ikipe ya Strasbourg mu mukino wa nyuma Henri yayitoje, byarushijeho kuyishyira mu mazi abira, isigara ibura amanota atatu ngo ibe yava mu cyiciro cya mbere.

Monaco, yatwaye igikombe cya shampiyona mu mwaka wa 2017, yashoboye gutsinda imikino itanu gusa mu marushanwa yose itozwa na Henri.

Mu itangazo Henri w'imyaka 41 y'amavuko yasohoye amaze kwirukanwa, yagize ati: "Nakiranye akababaro kenshi kuva mu ikipe ya AS Monaco. Nubwo bwose twahuye n'ibibazo muri uru rugendo rugufi, naryohewe n'igihe namaze muri iyi kipe ikomeye".

"Intego yanjye n'imikorere yanjye kuva ku munsi nayigezemo izakomeza kuba ko ikipe iza imbere y'ibindi byose. Mfitiye icyizere gikomeye aba bakinnyi, kandi hamwe n'abaherutse kugurwa, bari mu gihe cyiza cyo guhangana n'igice cya kabiri cya shampiyona babona intsinzi..."

Jardim wamaze imyaka ine atoza Monaco akaza no kuyihesha igikombe cya shampiyona mu mwaka w'imikino wa 2016-2017, yahawe kontaro y'imyaka ibiri n'igice.

Visi-perezida Vasilyev yavuze ko muri uku kwezi kwa mbere hashobora kugurwa n'abandi bakinnyi mu rwego rwo kunganira umutoza Jardim.

Ibindi bisa n’ibi