Ole Gunnar Solskjaer avuga ko Manchester United itanyurwa no kuba mu makipe ane ya mbere, ko 'ishaka gutwara ibikombe'

Ole Gunnar Solskjaer atoza Manchester United nk'umutoza w'inzibacyuho guhera mu kwezi kwa cumi na kabiri k'umwaka ushize wa 2018, nyuma yo kwirukanwa kwa Jose Mourinho Uwufise ububasha kw’isanamu Reuters
Image caption Ole Gunnar Solskjaer atoza Manchester United nk'umutoza w'inzibacyuho guhera mu kwezi kwa cumi na kabiri k'umwaka ushize wa 2018, nyuma yo kwirukanwa kwa Jose Mourinho

Ole Gunnar Solskjaer, umutoza w'inzibacyuho wa Manchester United, avuga ko iyi kipe itazanyurwa gusa no kurangiza shampiyona y'uyu mwaka iri mu myanya ine ya mbere, ko "ishaka gutwara ibikombe".

Kuri ubu, Manchester United iri ku mwanya wa gatandatu ku rutonde rw'agateganyo rwa shampiyona ya Premier League, kandi iracyari no mu irushanwa rya FA Cup n'irya Champions League.

Yagize ati: "Turi Man United, tuba dukwiye iteka guhora tugambiriye gutsindira igikombe cya shampiyona".

Ole Gunnar amaze gutsinda imikino itandatu yose ya shampiyona amaze gutoza Manchester United, kuva yasimbura Jose Mourinho mu kwezi kwa cumi na kabiri k'umwaka ushize wa 2018.

Uyu mu Munya-Norvège w'imyaka 45 y'amavuko yongeyeho ati: "Ntabwo twabishobora uyu mwaka, ariko tugomba kongera tukajya tuba ari byo tugambiriye".

Manchester United irushwa amanota 16 na Liverpool iyoboye urutonde rw'agateganyo rwa shampiyona, ariko ikaba ibura gusa amanota atatu ngo ibe yagera mu myanya ine ya mbere

Uwufise ububasha kw’isanamu Getty Images
Image caption Kuva Manchester United yatangira gutozwa na Ole Gunnar Solskjaer by'inzibacyuho, nta mukino n'umwe iratsindwa mu marushanwa yose

Umutoza Ole Gunnar avuze aya magambo nyuma yaho umutoza Mauricio Pochettino w'ikipe ya Tottenham avugiye ko ari ingenzi kurushaho kuba ikipe ye iri mu makipe ane ya mbere bigatuma yakina imikino ya Champions League, kurusha ko yahatanira ibikombe.

Ole Gunnar yagize ati: "Hari Champions League, hari FA Cup, ntabwo twavuga gusa ngo kuza mu myanya ine ya mbere ngo ni ibyo nta kindi".

"Tugomba gutekereza tuti 'hari ikintu twatsindira uyu mwaka?' kandi njya gutoza umukino uwo ari wo wose nk'umutoza wa Man United ntekereza ko dushobora kuwutsinda".

Igikombe Manchester United iheruka gutwara - cya Europa League - yagitwaye mu mwaka wa 2017, hashize umwaka itwaye igikombe iheruka cya FA Cup, ariko ntiratsindira igikombe cya shampiyona guhera mu mwaka w'imikino wa 2012-2013.

Mu kwezi gutaha kwa kabiri, izakina na Chelsea - ifite igikombe giheruka cya FA Cup - mu cyiciro cya gatanu cy'iri rushanwa, inakine na Paris St-Germain mu mikino ya Champions League.