Umutoza Pep Guardiola, watsinzwe na Newcastle, avuga ko afite impungenge ku mikino 'ikomeye' iri imbere

Wabaye umukino wa kane Manchester City y'umutoza Pep Guardiola itsinzwe muri uyu mwaka w'imikino Uwufise ububasha kw’isanamu Getty Images
Image caption Wabaye umukino wa kane Manchester City y'umutoza Pep Guardiola itsinzwe muri uyu mwaka w'imikino

Umutoza Pep Guardiola yavuze ko ikipe ye ya Manchester City ifite "akazi gakomeye" ko guhangana n'urukurikirane rw'imikino igoye ya shampiyona mu gihe iyi kipe, yatsinzwe na Newcastle 2-1 ku wa kabiri, ishaka kwisubiza igikombe cya shampiyona.

Liverpool - ya mbere ku rutonde rw'agateganyo rwa shampiyona - ishoboye gutsinda umukino wo kuri uyu wa gatatu uyihuza na Leicester ubera ku kibuga cya Leicester, yahita irusha Manchester City amanota arindwi.

Guardiola yagize ati: "Icyumweru gitaha kizadukomerera dukina na Arsenal, Everton na Chelsea".

"Niba dushaka nk'ikipe kwigira imbere, tugomba kwemera aka kazi gakomeye. Hari ibikombe byinshi n'amanota menshi byo guhatanira".

Ikipe ya Liverpool y'umutoza Jurgen Klopp igaragara nkaho ifite imikino yoroshye kurushaho ikina na West Ham na Bournemouth, nyuma y'umukino uza kuyihuza kuri uyu wa gatatu n'ikipe ya Leicester.

City ni yo yabanje gufungura amazamu ya Newcastle ku isegonda rya 24 ry'umukino ku gitego cyatsinzwe na Sergio Aguero - kikaba ari icya 17 atsinze muri uyu mwaka w'imikino, ariko cyabonetse mu buryo bune gusa iyi kipe yabonye bwo gutera mu izamu rya Newcastle.

Nuko Newcastle iza kucyishyura ku munota wa 66 gitsinzwe na Salomon Rondon. Nyuma Matt Ritchie aza gutsinda icy'intsinzi kuri penaliti nyuma y'ikosa Fernandinho yari akoreye kuri Sean Longstaff.

Uyu wabaye umukino wa kane Manchester City itsinzwe muri uyu mwaka w'imikino kandi ubu iyi kipe itozwa na Pep Guardiola imaze gutsindwa ibitego bingana n'ibyo yatsinzwe mu mwaka w'imikino ushize wose uko wakabaye.

Guardiola, wanatoje Barcelona na Bayern Munich, yongeyeho ati: "Nkunda aba bakinnyi".

"Bampaye icyubahiro cyose mfite mu Bwongereza. Nzagerageza kuhababera mbafashe. Ndabizi uko biyumva ubu kandi mbari inyuma, hafi yabo. Ni itsinda ritangaje ry'abakinnyi..."

Abajijwe ku mukino yatsinzwemo na Newcastle ku kibuga cyayo cya St James' Park, Guardiola yagize ati: "Umukino wacu wagenda gahoro, ntabwo twashyizemo ishyaka. Bateye ishoti ya mbere babona igitego, iya kabiri ivamo penaliti. Ariko Newcastle ni iyo gushimirwa".