Bournemouth yanyagiye Chelsea iyikura mu makipe ane ya mbere ku rutonde rw'agateganyo rwa Premier League

Rutahizamu Joshua King yatsinze bibiri mu bitego bine Bournemouth yatsinze Chelsea yari yayisuye ku kibuga cyayo cya Vitality Stadium Uwufise ububasha kw’isanamu Reuters
Image caption Rutahizamu Joshua King yatsinze bibiri mu bitego bine Bournemouth yatsinze Chelsea yari yayisuye ku kibuga cyayo cya Vitality Stadium

Chelsea yakuwe mu myanya ine ya mbere ku rutonde rw'agateganyo rwa shampiyona ya Premier League ndetse bigabanya n'icyizere cyayo cyo gukina imikino ya Champions League, nyuma yaho ku wa gatatu inyagiriwe ibitego 4-0 na Bournemouth.

Ni ibitego byatsinzwe na Joshua King - watsinzemo bibiri, David Brooks na Charlie Daniels.

Bournemouth yabaye inyamahirwe mu kurangiza igice cya mbere cy'umukino ari 0-0 ubwo umunyezamu wayo Artur Boruc yakuragamo imipira itanu yari yabazwemo ibitego, akabuza atyo Chelsea - yari yananiwe kumenera mu bakabiri bayo nubwo bwose yari yihariye umukino ku kigero cya 70% - kubona igitego.

Intsinzi ya kabiri yikurikiranya ya Bournemouth yatumye izamuka ku rutonde rw'agateganyo rwa shampiyona, ubu ikaba iri ku mwanya wa 10, mu gihe Chelsea ubu yagiye ku mwanya wa gatanu hagendewe ku kuba yaratsinze ibitego bicye ugereranyije na Arsenal kuri ubu yafashe umwanya wa kane.

Umutoza Eddie Howe wa Bournemouth, yavuze ko yishimiye uko ikipe ye iri kwitwara muri shampiyona, avuga ko iyi intsinzi iri mu zimaze kumushimisha cyane nk'umutoza kugeza ubu.

Yagize ati: "Rwari ijoro ryiza kuri twe kandi byari byiza kubikorera hano imbere y'abafana bacu".

Mugenzi we Maurizio Sarri w'ikipe ya Chelsea, we yavuze ko ikipe ye "igomba guhindura imitekerereze".

Yagize ati: "... Ushobora gutsindwa, ariko uba ucyeneye [gukomeza] gukina kuko umukino ni twe twari turikuwuyobora mu gice cya mbere".

Ku wa gatandatu, Bournemouth izakina na Cardiff City bakinire ku kibuga cya Cardiff City, mu gihe Chelsea iyo izaba yakiriye Huddersfield Town kuri uwo munsi.