Umutoza Mauricio Pochettino wa Tottenham avuga ko 'abantu basuzugura' ikipe ye 'itangaje'

Umutoza Mauricio Pochettino yinjije mu kibuga rutahizamu Fernando Llorente ku munota wa 84 asimbura, ahita atsinda igitego ku mupira wa mbere yari afashe ari mu rubuga rw'amahina rwa Borussia Dortmund Uwufise ububasha kw’isanamu Getty Images
Image caption Umutoza Mauricio Pochettino yinjije mu kibuga rutahizamu Fernando Llorente ku munota wa 84 asimbura, ahita atsinda igitego ku mupira wa mbere yari afashe ari mu rubuga rw'amahina rwa Borussia Dortmund

Umutoza Mauricio Pochettino wa Tottenham yavuze ko "abantu basuzugura" ikipe ye ndetse ko abakinnyi be ari "intwari", nyuma yo kunyagira Borussia Dortmund yo mu Budage ibitego 3-0 mu mukino ubanza mu yo mu cyiciro cyo gukuranamo mu irushanwa rya Champions League.

Son Heung-min, Jan Vertonghen na Fernando Llorente ni bo batsinze ibyo bitego mu gice cya kabiri Tottenham yihariye, muri uyu mukino wabereye ku kibuga cya Wembley mu Bwongereza.

Pochettino yagize ati: "Iyi kipe ni indwanyi. Iranshimishije cyane".

"Bakwiye ishimwe ryose. Ibyo bari gukora biratangaje".

Tottenham yakoze ibisa nk'ibitangaza ubwo yakomezaga muri iki cyiciro cy'imikino yo guhita amakipe akuranamo cya Champions League, mu gihe nyamara mu cyiciro cyo mu matsinda yabonye inota rimwe mu mikino itatu ibanza.

Muri uyu mukino wabaye ku wa gatatu, Tottenham ntabwo yari ifite rutahizamu kizigenza wayo, Harry Kane, ndetse n'umukinnyi ukina hagati mu kibuga, Dele Alli.

Ariko yashoboye gutsinda Dortmund imaze kugera muri iki cyiciro cy'imikino ya Champions League inshuro eshanu mu myaka itandatu y'imikino ishize.

Pochettino yavuze ko Son, rutahizamu ukomoka muri Koreya y'epfo, "yafashije cyane" iyi kipe atsinda igitego cya mbere.

Yagize ati: " Son nanone yabaye umukinnyi w'igitangaza. Ntekereza ko ari umukinnyi uha ikipe ibintu byinshi. Aramwenyura kandi afite ingufu nyinshi. Imikinire ye ikomeje gutera imbere umukino ku mukino".

Umukino wo kwishyura uteganyijwe kuba ku itariki ya 5 y'ukwezi gutaha kwa gatatu ku kibuga Westfalenstadion cya Dortmund mu Budage.

Pochettino, Umunya-Argentine w'imyaka 46 y'amavuko, yongeyeho ati: "Ibitego 3-0 ni intsinzi nziza cyane, ariko nanone ntekereza ko dukwiye gutekereza ko ducyeneye kurangiza uyu murimo neza".

"Iteka iyo dukina muri iri rushanwa kandi dukina n'ikipe nziza nka Dortmund, biba bigoye cyane".