Neymar 'yarize iminsi ibiri' nyuma yo kuvunika ku kirenge mu kwezi gushize kwa mbere

Rutahizamu Neymar w'ikipe y'igihugu ya Brezili na Paris-Saint Germain avuga ko yarize iminsi ibiri nyuma yaho avunikiye igufa ryo ku kirenge cye cy'iburyo mu mpera y'ukwezi gushize kwa mbere.

Byitezwe ko Neymar atazongera gukina mbere y'ukwezi kwa kane uyu mwaka.

Ni imvune yagize ubwo yakinaga mu mukino w'igikombe cy'Ubufaransa wahuzaga Paris Saint-Germain n'ikipe ya Strasbourg.

Iyi mvune ni kimwe n'iyo yagize mu kwezi kwa kabiri k'umwaka ushize wa 2018 igatuma hashidikanywa niba yari gushobora gukina imikino y'igikombe cy'isi yabereye mu Burusiya muri uwo mwaka.

Ariko Neymar avuga ko kuri iyi nshuro, imvune ye "ikaze cyane kurushaho".

Neymar w'imyaka 27 y'amavuko, yabwiye televiziyo Globo yo muri Brezili ati: "Kuri iyi nshuro, byarangoye cyane kubyakira".

Yongeyeho ati: "Namaze iminsi ibiri mu rugo ndira".

"Ku nshuro ya mbere ubwo navunikaga, naravuze nti, 'Nzabagwa, ngomba gukira vuba bishoboka'. Ntabwo nari mbabaye".

Mu mwaka ushize wa 2018, Neymar yamaze amezi atatu adakina nyuma yo kubagwa, yongera gushobora gukina neza neza mu gihe imikino y'igikombe cy'isi yendaga gutangira ndetse aza no gutsinda ibitego bibiri muri iyo mikino Brezili yagarukiye muri kimwe cya kane.

Kuri iyi nshuro, abaganga b'ikipe ya Paris Saint-Germain bafashe icyemezo cyo kumuvura bagendeye kuko yavuwe ubushize aho kugira ngo bongere kumubaga bundi bushya.

Ubuyobozi bwa Paris Saint-Germain butangaza ko azamara ibyumweru birenga 10 atongeye gukina.

Bivuze ko atazakina mu mukino wo kwishyura uzabahuza na Manchester United, nyuma yaho mu mukino ubanza wo mu cyumweru gishize Paris Saint-Germain itsinze Manchester United ibitego 2-0 ku kibuga Old Trafford cya Manchester United.

Uyu mukino wo kwishyura uteganyijwe kuba ku itariki ya 6 y'ukwezi gutaha kwa gatatu, mu murwa mukuru Paris w'Ubufaransa.