Sadio Mane yibwe mu nzu iwe ubwo yari mu mukino wa Champions League

Mane yageze muri ikipe ya Liverpool mu mwaka wa 2016 avuye mu ikipe ya Southampton Uwufise ububasha kw’isanamu Getty Images
Image caption Mane yageze muri ikipe ya Liverpool mu mwaka wa 2016 avuye mu ikipe ya Southampton

Polisi y'Ubwongereza itangaza ko rutahizamu Sadio Mane wa Liverpool n'uw'ikipe y'igihugu ya Sénégal yibwe mu nzu iwe ubwo yarimo akina mu mukino wa Champions League wahuje Liverpool na Bayern Munich yo mu Budage ku wa kabiri w'iki cyumweru.

Ibikoresho bye birimo nk'amasaha, za telefone zigendanwa n'imfunguzo z'imodoka ni bimwe mu byo yibwe.

Ibi byabereye ku nzu ya Mane iri ahitwa Allerton, mu majyepfo y'umujyi wa Liverpool, hagati ya saa kumi n'ebyiri z'umugoraba na saa tanu n'iminota 45 z'ijoro ku isaha ngengamasaha ya GMT, ubwo Mane w'imyaka 26 y'amavuko yari ku kibuga Anfield cya Liverpool.

Nta muntu n'umwe wari uri mu rugo iwe muri icyo gihe.

Hari gusuzumwa ibimenyetso kandi na polisi y'Ubwongereza ikomeje iperereza kuri ubwo bujura.

Phil Mahon, umukuru wa polisi ikorera ahitwa Merseyside mu majyaruguru ashyira uburengerazuba bw'Ubwongereza, yagize ati: "Turasaba buri muntu wese waba afite amakuru ajyanye n'ubu bujura ko rwose yatugana akadufasha mu iperereza".

"Mu gihe ababa mu nzu batari bahari ubwo byabaga, nta gushidikanya ko ibi byabahungabanyije, kandi ndasaba ababikoze ko bakora igikwiye bagasubiza ibyibwe ba nyirabyo mu buryo bwabashobokera ubwo ari bwo bwose".

"Tuzi ko by'umwihariko amasaha [ye] ahenze cyane, ndetse nifuzaga no gusaba uwo ari we wese ushobora kuba yarahawe ibyibwe ngo abigurishe kuva byakwibwa, ko yabimenyesha polisi".

Mu kwezi kwa cumi na kumwe mu mwaka wa 2017, Mane nabwo yibwe ubwo Liverpool yarimo ikina n'ikipe ya Maribor yo muri Slovenia mu mukino wa Champions League waberaga ku kibuga Anfield.

Byibazwa ko icyo gihe igico cy'amabandi cyabanje kwirara mu nzu ye, mbere yuko kimena urugi rwo ku ibaraza rwo kwa Dejan Lovren, mugenzi we baturanye banakinana muri Liverpool, nuko ayo mabandi agahunga ubwo umugore yateraga hejuru avuga ko agiye guhuruza polisi.