Umutoza Maurizio Sarri wa Chelsea avuga ko habayeho 'kutumvikana neza' ku gushaka gusimbuza Kepa

Umutoza Maurizio Sarri (iburyo) yitegura kwinjiza mu kibuga nk'umusimbura umunyezamu Willy Caballero

Ahavuye isanamu, Getty Images

Insiguro y'isanamu,

Umutoza Maurizio Sarri (iburyo) yitegura kwinjiza mu kibuga nk'umusimbura umunyezamu Willy Caballero

Umutoza Maurizio Sarri w'ikipe ya Chelsea avuga ko ibyabaye bijyanye n'umunyezamu Kepa Arrizabalaga w'iyi kipe mu mukino wa nyuma w'igikombe Carabao Cup byatewe no "kutumvikana neza".

Uyu munyenzamu wa mbere uhenze mu mateka y'iyi kipe yaguze miliyoni 71 z'amapawundi, yagaragaye nk'uwirengagiza amabwiriza yo kugerageza kumusimbura mu minota y'inyongera y'umukino mbere yuko Manchester City yegukana iki gikombe kuri penaliti.

Sarri yagaragaye nk'ufite uburakari bwinshi ndetse aba nk'usohotse mu kibuga mbere yuko ahita agaruka.

Sarri yagize ati: "Ntabwo numvise neza ikibazo, nuko nza kucyumva neza gusa ubwo umuganga w'ikipe yageraga ku ntebe y'abasimbura".

"[Umunyezamu Kepa] Yumvaga ko nshaka kumusimbuza kubera ko atameze neza ku mubiri. Aravuga ati' 'Nta kibazo ndagira ku mubiri' - kandi yari mu kuri".

Kepa w'imyaka 24 y'amavuko, na we yaje kunga mu ry'umutoza Sarri, ashimangira ko ibyabaye byatewe n'urujijo.

Kepa yagize ati: "Habayeho kutumvikana neza. Ntabwo nigeze nshaka gusuzugura umutoza cyangwa ikindi kintu icyo ari cyo cyose".

Yongeyeho ati: "Habayeho iminota nk'ibiri cyangwa itatu y'urujijo kugeza ubwo abaganga b'ikipe bageraga ku ntebe y'abasimbura nuko bakabisobanura neza".

"[Umutoza] Yagize ngo singishoboye gukomeza umukino, kandi mu by'ukuri icyo nageragezaga kuvuga ni uko nari meze neza ku mubiri".

Ahavuye isanamu, Getty Images

Insiguro y'isanamu,

Umunyezamu Kepa wa Chelsea ubwo yangaga gusimburwa mu mukino wa nyuma w'igikombe Carabao Cup

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Uyu munyezamu w'Umunya-Espanye yari yigeze kugira ikibazo cyo guhinyagara, bituma ku ntebe y'abasimbura ya Chelsea batangira gutegura umunyezamu w'umusimbura Willy Caballero.

Sarri yagaragaye nk'urakaye ubwo umunyezamu Kepa yangaga gukurikiza amabwiriza yo hanze y'ikibuga, ariko kera kabaye arabyakira nyuma yo kuganira n'umusifuzi Jonathan Moss.

Sarri yagize ati: "Nabyumvise nyuma, ubwo umuganga w'ikipe yazaga. Naganiriye na we [Moss], ariko byo gukuraho urujijo noneho kuko nari namaze kumva ikibazo cyari gihari".

"Kwari ukutumvikana neza gukomeye cyane kuko jye numvaga ko umunyezamu yagize ikibazo cyo guhinyagara, ko ataba akibashije kujya mu gice cya za penaliti. Ariko ntabwo kwari uguhinyagara kandi yashoboraga gukina mu gice cya za penaliti".

"Nari nkeneye gusa nk'uvuye mu kibuga kugira ngo ntuze muri jye".

Ariko John Terry, wahoze ari kapiteni wa Chelsea, yabwiye televiziyo Sky Sports ko yemeza ko igisobanuro cya Sarri cyuko ibyabaye byatewe no "kutumvikana neza", ari icyemezo yafashe ngo akingire ikibaba umunyezamu we.

Yagize ati: "Muri rubanda, ni ko abigenza. Arwana ku mukinnyi we".