Umunyezamu Kepa Arrizabalaga wa Chelsea, wanze gusimburwa, yaciwe amande asaba n'imbabazi

Chelsea yaguze Kepa Arrizabalaga mu kwezi kwa munani k'umwaka ushize wa 2018 imukuye muri Athletic Bilbao, kuri miliyoni 71 z'amapawundi - aba umunyezamu wa mbere uhenze kurusha abandi iguze Uwufise ububasha kw’isanamu Getty Images
Image caption Chelsea yaguze Kepa Arrizabalaga mu kwezi kwa munani k'umwaka ushize wa 2018 imukuye muri Athletic Bilbao, kuri miliyoni 71 z'amapawundi - aba umunyezamu wa mbere uhenze kurusha abandi iguze

Umunyezamu Kepa Arrizabalaga wa Chelsea yaciwe amande angana n'umushahara we w'icyumweru ndetse asaba imbabazi kubera kwanga gusimburwa mu mukino wa nyuma w'igikombe Carabao Cup wabaye ku cyumweru, Chelsea ikawutsindwa kuri penaliti na Manchester City.

Uyu munyezamu w'Umunya-Espanye yanze gusimburwa n'umunyezamu mugenzi we Willy Caballero, muri uwo mukino wabereye ku kibuga cya Wembley.

Mu itangazo ryasohowe na Chelsea, Kepa yagize ati: "Nubwo habayeho kutumvikana neza, iyo nsubije amaso inyuma nkabitekerezaho, nsanga narakoze ikosa rikomeye ku kuntu nitwaye mu byabaye".

Umutoza Maurizio Sarri wa Chelsea yavuze ko kuva ibyo byaba, yamaze kugirana "ikiganiro cyiza" na Kepa.

Sarri wagaragaye yarakaye ubwo Kepa yangaga kuva mu kibuga ahagana mu mpera y'iminota y'inyongera y'umukino, yanavuze ko ibyabaye byatewe no "kutumvikana neza".

Ariko yongeyeho ati: "Kepa asanga yarakoze ikosa rikomeye mu buryo yabyitwayemo".

"Yansabye imbabazi, asaba imbabazi abakinnyi bagenzi be ndetse n'ubuyobozi bw'ikipe. Ni ah'ikipe niba ishaka kumufatira ibihano bijyanye n'imyitwarire hakurikijwe amategeko y'ikipe, ariko kuri jye ibyabaye byararangiye".

"Muri rusange, ikipe yitwaye neza cyane kandi birababaje ukuntu ibi byabaye byapfukiranye ubwitange bwacu muri uriya mukino wa nyuma wari urimo guhangana gukomeye cyane".

Kepa wabaye umunyezamu wa mbere Chelsea iguze amafaranga menshi cyane kurusha abandi - miliyoni 71 z'amapawundi - ubwo yayigeragamo mu kwezi kwa munani k'umwaka ushize wa 2018 avuye muri Athletic Bilbao, yirengagije umutoza we Sarri washakaga kumusimbuza Caballero.

Hari mbere yuko Manchester City itsinda uwo mukino kuri penaliti.

Uyu mutoza w'Umutaliyani yagaragaye yarubiye, nuko asa nk'usohotse mu kibuga mbere yuko ahita agaruka.

Kepa w'imyaka 24 y'amavuko yagize ati: "Ndashaka gufata aka kanya uyu munsi ngo nsabe imbabazi nivuye inyuma kandi ubwanjye mpibereye, umutoza, Willy, abakinnyi bagenzi banjye n'ubuyobozi bw'ikipe".

"Ibi nabikoze, none ubu ndashaka gusaba n'imbabazi abafana. Ibi byampaye isomo kandi nzemera igihano icyo ari cyo cyose cyangwa ingamba zijyanye n'imyitwarire ubuyobozi bw'ikipe buzemeza ko bikwiye".

Ubuyobozi bwa Chelsea buvuga ko ayo mande yaciwe Kepa buzayaha umuryango ufasha ushamikiye kuri iyi kipe wa Chelsea Foundation.