Uefa ishinja kapiteni Sergio Ramos wa Real Madrid 'kwihesha ikarita y'umuhondo ku bushake'

Kapiteni Sergio Ramos wa Real Madrid yagize uruhare rukomeye mu bikombe bitatu bya Champions League iyi kipe iheruka gutwara yikurikiranya Uwufise ububasha kw’isanamu Reuters
Image caption Kapiteni Sergio Ramos wa Real Madrid yagize uruhare rukomeye mu bikombe bitatu bya Champions League iyi kipe iheruka gutwara yikurikiranya

Ishyirahamwe ry'umupira w'amaguru ku mugabane w'Uburayi, Uefa, rishinja Sergio Ramos, kapiteni wa Real Madrid, "kwihesha ikarita y'umuhondo ku bushake" mu mukino ubanza wa Champions League wahuje Real Madrid na Ajax muri uku kwezi kwa kabiri.

Ramos yakoreye ikosa rutahizamu Kasper Dolberg wa Ajax ku munota wa 89 w'umukino ubwo Real yari yamaze gutsinda ibitego 2-1, bivuze ko atazakina mu mukino wo kwishyura.

Uefa yatangije iperereza ubwo nyuma y'uwo mukino, Ramos yabwiraga abanyamakuru ati: "Naba mbeshye mvuze ko ntayihesheje [ikarita]".

Biteganyijwe ko Uefa yiga kuri iki kibazo ejo ku wa kane ku itariki ya 28 y'uku kwezi kwa kabiri.

Nyuma yaho, Ramos yasobanuye amagambo yavuze nyuma y'uwo mukino, agira ati: "Nari ndi kuvuga ku gukora ikosa ku bushake, ikosa ryagombaga kuba. Ntabwo navugaga ku kwihesha ikarita".

"Bari baduhindukiranye ku munota wa 88 [w'umukino], kandi umukino wari ugifunguye ndetse no mu itsinda ibintu bitarasobanuka neza kuri buri kipe".

Ramos yongeyeho ati: "Iyo ni yo mpamvu yatumye mvuga ko naba mbeshye mvuze ko ntari nzi ko nari ndimo gukora ikosa, cyo kimwe nuko nari mbizi ko nta yandi mahitamo nari mfite atari ayo gukora ikosa".

"Rero ibyo ni ibyo nashakaga kuvuga ubwo navugaga ko mu mupira w'amaguru ugomba gufata ibyemezo bikomeye".

Mu guhagarikwa umukino umwe muri iki cyiciro cy'irushanwa, Ramos yagabanyije ibyago byo kuba yabuzwa gukina umukino w'ingenzi cyane kurushaho mu gihe iri rushanwa rizaba riri kwerekeza ku musozo, kuko amakarita yose y'umuhondo umukinnyi yahawe ahita aburizwamo nyuma y'imikino ya kimwe cya kane.

Ariko iyo bitahuwe ko umukinnyi yihesheje ikarita ku bushake, ashobora guhanishwa guhagarikwa imikino ibiri adakina.

Abajijwe niba yari azi ko iryo kosa ryashoboraga kumuviramo guhabwa ikarita y'umuhondo ndetse no kuba yahagarikwa, Ramos yagize ati: "Yego. Ariko nta mahitamo nari mfite".