Sergio Ramos avuga ko ari we wo kuryozwa guhagarikwa na Uefa, agashyigikira Real Madrid

Sergio Ramos amaze gutwara igikombe cya Champions League inshuro enye ari kumwe n'ikipe ya Real Madrid Uwufise ububasha kw’isanamu Getty Images
Image caption Sergio Ramos amaze gutwara igikombe cya Champions League inshuro enye ari kumwe n'ikipe ya Real Madrid

Sergio Ramos, kapiteni wa Real Madrid, avuga ko ari we wo kuryozwa icyo ishyirahamwe ry'umupira w'amaguru ku mugabane w'i Burayi, Uefa, rivuga ko ari ukwihesha ikarita y'umuhondo ku bushake no kubura mu mukino yatsinzwemo na Ajax igasezererwa muri Champions League.

Ikarita Ramos yahawe ku munota wa 89 w'uwo mukino ubanza wa kimwe cy'umunani cy'irangiza, ubwo Real yari yamaze gutsinda ibitego 2-1, yatumye adashobora gukina mu mukino wo kwishyura.

Ariko Ramos yahagaritswe imikino ibiri na Uefa kubera "kwihesha ikarita y'umuhondo mu buryo bugaragara", ndetse na Real, yatwaye igikombe cya Champions League inshuro eshatu ziheruka yikurikiranya, iza kunyagirwa ibitego 4-1 mu mukino wo kwishyura wabereye ku kibuga cyayo cya Santiago Bernabéu.

Ramos yagize ati: "Rwose ryari ikosa [nakoze]".

"Ndemera ku ijanisha rya 200 ku 100 [200%] ko ari jye wo kubyegekwaho".

Mu rukurikirane rw'ubutumwa yatangaje ku wa mbere ku rubuga nkoranyambaga rwa Twitter, Ramos yashyigikiye bikomeye Real Madrid.

Ku wa mbere kandi Zinedine Zidane yongeye kugirwa umutoza mukuru w'iyi kipe, hashize gusa amezi 10 ayisezeyemo, ndetse Santiago Solari yirukanwa ku butoza.

Real iri ku mwanya wa gatatu muri shampiyona ya Espanye izwi nka La Liga, ikaba irushwa amanota 12 na Barcelona iri ku mwanya wa mbere ku rutonde rw'agateganyo, mu gihe habura imikino 11 ngo shampiyona y'uyu mwaka irangire.

'Real Madrid izahora iteka ari Real Madrid'

Ramos usanzwe ari na myugariro w'ikipe y'igihugu ya Espanye yongeyeho ati: "Nk'abakinnyi b'umupira w'amaguru, dukunda kureka amagambo yacu akavugwa n'ibikobwa byacu mu kibuga, ariko uyu mwaka w'imikino ntabwo uri kubitwemerera".

"Ibintu biherutse kuba byabaye akaga gakomeye kandi sindibwihishe. Ntabwo turibwihishe. Twebwe nk'abakinnyi ni twe ba mbere bo kubiryozwa kandi jyewe, nka kapiteni, ni jye wo kubiryozwa kurusha undi uwo ari we wese".

Ramos yavuze kandi ko abakinnyi "bubaha cyane umwanya w'ubutoza" kandi "iteka bashyigikira" umutoza wa Real Madrid.

Yagize ati: "Ni icyemezo tudafata kandi nta na rimwe tujya tukivangamo".

"Iyo nsubije amaso inyuma, nta gushidikanya ko uyu mwaka w'imikino watugendecyeye nabi cyane, ariko niba intsinzi itaraduhagaritse, ntabwo turi bureke n'intsinzwi ngo iduhagarike".

"Ni inshingano yacu gukomeza, gukora no gutera indi ntambwe. Kandi twibuka ko bamwe muri twe dufite amahirwe cyane yo kuba dukinira Real Madrid, ko bamwe muri twe dufite amahirwe cyane yo kuba bamwe mu banditse amateka yayo, ariko ko Real Madrid ni, kandi izahora iteka ari, Real Madrid".

"Nta zina na rimwe ryigeze rituma Real Madrid iba icyatwa, ahubwo twe twese ni twe twayigize icyatwa twese hamwe".

Ibindi bisa n’ibi