Cristiano Ronaldo, wafashije Juventus gusezerera Atletico Madrid, ati: 'Iyi ni yo mpamvu yanzanye hano'

Cristiano Ronaldo yatsinze igitego cye cya 122 muri Champions League mu gice cya mbere cy'umukino, mbere yuko yongeraho ibindi bibiri mu gice cya kabiri Uwufise ububasha kw’isanamu Reuters
Image caption Cristiano Ronaldo yatsinze igitego cye cya 122 muri Champions League mu gice cya mbere cy'umukino, mbere yuko yongeraho ibindi bibiri mu gice cya kabiri

Cristiano Ronaldo yongeye kugaragaza agaciro ke mu irushanwa rya mbere ry'umupira w'amaguru ku mugabane w'Uburayi afasha ikipe ye ya Juventus kwigaranzura Atletico Madrid yari yayitsinze ibitego 2-0 mu mukino ubanza, ayigeza muri kimwe cya kane cya Champions League.

Abafana b'iyi kipe ya Juventus yo mu mujyi wa Turin mu Butaliyani bari batarabona umusaruro w'uyu mukinnyi wabo waguzwe miliyoni 99 z'amapawundi ku mpeshyi ishize, umusaruro nk'uwo yagaragaje ku mugabane w'i Burayi afasha Real Madrid gutwara ibikombe bine bya Champions League mu myaka itanu y'imikino.

Ariko byose byahindutse mu ijoro ryo ku wa kabiri ry'amateka kuri bo ku kibuga cy'iyi kipe cya Allianz.

Nyuma yo kugarura umukino ibubisi amaze gutsinda ibitego bibiri by'umutwe asanzwe amenyereweho byatumye Juventus inganya na Atletico Madrid ibitego 2-2 mu mikino yombi, Cristiano yongeyeho icy'intsinzi kuri penaliti habura iminota ine ngo umukino urangire, nyuma y'ikosa ryari rikorewe kuri Federico Bernardeschi.

Yinjira atyo mu mateka ya Juventus.

Cyari kibaye igitego cye cya 124 muri Champions League ndetse hari ku nshuro ya munani atsinze ibitego bitatu mu mukino umwe muri iri rushanwa.

'Iyi ni yo mpamvu Juventus yanzanye hano'

Nyuma y'uwo mukino, Cristiano w'imyaka 34 y'amavuko yagize ati: "Ryagombaga kuba ijoro ridasanzwe, atari gusa kubera ibitego byanjye, ariko no kubera umwuka twagaragaje [mu kibuga]".

"Ubu ni bwo bwoko bw'imitekerereze uba ucyeneye kugira ngo utsindire Champions League".

"Iyi ni yo mpamvu Juventus yanzanye hano. Kugira ngo mfashe mu gukora ibintu itari yarigeze ikora mbere yaho".

Umutoza Massimiliano Allegri wa Juventus yashimagije ikipe ye avuga ko yagaragaje "gukura cyane".

Yagize ati: "Hari ibyago byo kuba twatwarwa n'amarangamutima, tugashaka ko buri kintu cyose kirangira mu minota 10 ya mbere y'umukino".

Gutsindwa kwa Atletico Madrid gusobanuye ko ibuze n'amahirwe yo kuba yashoboraga kuba yazakinira umukino wa nyuma wa Champions League ku kibuga cyayo bwite cya Wanda Metropolitano, umukino uteganyijwe kuba ku itariki ya mbere y'ukwezi kwa gatandatu uyu mwaka.

Rutahizamu Antoine Griezmann wa Atletico Madrid yavuze ko Juventus yabarushije gukina. Yagize ati: "Bakinnye neza cyane kuturusha uyu munsi [ku wa kabiri]. Ntabwo wari umunsi wacu".

Tombola ku ko amakipe azahura muri kimwe cya kane, iteganyijwe kuba ku wa gatanu w'iki cyumweru, saa tanu ku isaha ngengamasaha ya GMT.

Kwitwara neza kwa Cristiano muri uwo mukino gusobanuye iki?

  • Gusobanuye ko ubu amaze gutsinda ibitego 124 muri iri rushanwa rya mbere ry'umupira w'amaguru ryo ku mugabane w'Uburayi - akaba arusha ibitego 18 Lionel Messi umukurikiye ku mwanya wa kabiri mu bamaze gutsinda ibitego byinshi kurusha abandi;
  • Ibyo bitego kandi biruta ibyo Atletico Madrid, imaze kugera ku mukino wa nyuma inshuro eshatu, imaze gutsinda;
  • Cristiano amaze gutsinda ibitego bitatu mu mukino umwe wa Champions League inshuro umunani - umuhigo ahuriyeho na Messi;
  • Cristiano aracyafite amahirwe yo kuba yakongera ku bikombe bitanu bya Champions League amaze gutwara - Francisco Gento, umukinnyi w'icyatwa wa Real Madrid, watwaye bitandatu, ni we wenyine umaze gutwara byinshi kumurusha;
  • Hagiye gushira hafi imyaka ine nta kipe irimo Cristiano isezerewe muri Champions League kandi birashoboka ko yatwara iki gikombe mu mwaka wa kane w'imikino yikurikiranya.