Ole Gunnar Solskjaer avuga ko Man Utd 'ishobora kugera kure hashoboka' muri Champions League

Ole Gunnar Solskjaer, umutoza w'agateganyo wa Manchester United, yanayikiniye mu myaka 11 y'imikino, aza no gutsinda igitego cy'intsinzi mu mukino wa nyuma wa Champions League wo mu mwaka wa 1999 Uwufise ububasha kw’isanamu Getty Images
Image caption Ole Gunnar Solskjaer, umutoza w'agateganyo wa Manchester United, yanayikiniye mu myaka 11 y'imikino, aza no gutsinda igitego cy'intsinzi mu mukino wa nyuma wa Champions League wo mu mwaka wa 1999

Ole Gunnar Solskjaer, umutoza w'agateganyo wa Manchester United, avuga ko ikipe ye "ishobora kugera kure hashoboka" nyuma yaho itomboleye kuzakina na Barcelona mu mikino ya kimwe cya kane cya Champions League.

Iyi tombola igiye gutuma Ole Gunnar asubira ku kibuga Nou Camp cya Barcelona yaherukagaho mu myaka 20 ishize ubwo yahatsindiraga igitego cy'intsinzi cyo mu minota y'inyongera mu mukino wa nyuma wa Champions League wo mu mwaka wa 1999.

Mu gihe Manchester United yaba ikomeje, yazahura na Liverpool mu mikino ya kimwe cya kabiri mu gihe na yo yaba ikomeje.

Ole Gunnar yagize ati: "Ndatekereza ko ubwo twahuraga na Paris St-Germain, twagaragaje ko ku munsi uwo ari wo wose dushobora gutsinda ikipe yo ku rwego rwo hejuru".

"Ikipe iyo ari yo yose ishobora gutsinda indi muri kimwe cya kane. Haracyarimo umupira wo ku rwego rwo hejuru cyane. Birumvikana, mu gihe hakirimo Cristiano [Ronaldo], ntabwo ntekereza ko ibintu byoroshye cyane".

Uyu Munya-Norvège w'imyaka 46 y'amavuko, yanditse amateka muri Champions League ubwo ikipe ye yabaga iya mbere ishoboye gusezerera iyari yayitsindiye iwayo ibitego 2-0 cyangwa birenga mu mukino ubanza, ubwo yatsindaga Paris St-Germain ibitego 3-1 mu mukino wo kwishyura.

Iyo ntsinzi icyesha igitego yatsindiye hanze - amakipe yombi yanganyaga ibitego 3-3 mu mikino yombi - yashimangiwe na penaliti yinjijwe na Marcus Rashford mu minota y'inyongera y'uwo mukino, yatanzwe habanje kugenzurwa uburyo bwa videwo bwunganira umusifuzi.

Ole Gunnar yongeyeho ati: "Hari ibintu byinshi bishoboka kandi iyi mikino [ya kimwe cya kane] izacyemurwa n'utuntu duto duto..."

"Nemera ko mu buzima, mu mikino, umuntu abona icyo akwiye. Iyo ukoze cyane, ukitwara neza, iyo buri munsi ukoze neza, biguha amahirwe yose ashoboka".

"Rero yego, dushobora kugera kure hashoboka, ariko bisaba no guhirwa ndetse no gukora neza mu nzira yose".