Bale yatsinze, Zidane atangiraga intsinzi mu mukino wa mbere yongeye gutoza Real Madrid

Abafana ba Real bashimagije Bale nyuma yo gutsinda igitego cya kabiri muri uwo mukino, bitandukanye no kumukomera byari bimaze igihe ubwo yabaga yinjiye mu kibuga Santiago Bernabeu cy'iyi kipe Uwufise ububasha kw’isanamu Getty Images
Image caption Abafana ba Real bashimagije Bale nyuma yo gutsinda igitego cya kabiri muri uwo mukino, bitandukanye no kumukomera byari bimaze igihe ubwo yabaga yinjiye mu kibuga Santiago Bernabeu cy'iyi kipe

Gareth Bale na Isco ni bo bafashije Real Madrid gutsinda Celta Vigo, batuma umutoza Zinedine Zidane atangirana intsinzi mu mukino wa mbere yari atoje iyi kipe kuva yakongera kugirwa umutoza wayo mu cyumweru gishize.

Isco utarakunze gukinishwa na Santiago Solari wari umutoza w'iyi kipe, ni we winjije igitego cya mbere ku mupira yari ahawe na rutahizamu Karim Benzema.

Nuko habura iminota 13 ngo umukino urangire, Bale ashyiramo icya kabiri.

Kuri ubu, Real irarushwa amanota abiri na Atletico Madrid iri ku mwanya wa kabiri ku rutonde rw'agateganyo rwa shampiyona La Liga y'icyiciro cya mbere muri Espanye.

Atletico Madrid itozwa na Diego Simeone yatsinzwe ibitego 2-0 na Athletic Bilbao mu wundi mukino wabaye ku wa gatandatu. Kuri iki cyumweru, Barcelona iri ku mwanya wa mbere by'agateganyo irakina na Real Betis ku kibuga cya Real Betis.

Ku mutoza Zidane n'ikipe ye ya Real Madrid, bisa nkaho igisigaye kuri bo muri uyu mwaka w'imikino - muri rusange wabaye mubi kuri iyi kipe - ari ukugerageza kurangiza idatsindwa bya hato na hato.

Ubwo uyu mutoza wahoze ayikinira nk'umukinnyi wo hagati yayisezeraga nk'umutoza mu mezi 10 ashize, yagiye amaze kuyihesha igikombe cya Champions League inshuro eshatu zikurikirana ndetse n'igikombe cya shampiyona ya La Liga.

Byari ibintu bidasanzwe kuri uyu mutoza mushya mu mwuga w'ubutoza. Ni intsinzi yanafashishwemo na rutahizamu Cristiano Ronaldo, kuri ubu usigaye akinira Juventus yo mu Butaliyani.

Kuva icyo gihe kandi, abatoza babiri bari bamusimbuye - Julen Lopetegui na Santiago Solari - bose barirukanwe.

Ibindi bisa n’ibi