Uefa ishinja Cristiano Ronaldo kugira 'imyitwarire itaboneye' mu kwishimira igitego

Cristiano amaze gutsinda ibitego 124 muri Champions League Uwufise ububasha kw’isanamu EPA
Image caption Cristiano amaze gutsinda ibitego 124 muri Champions League

Ishyirahamwe ry'umupira w'amaguru ku mugabane w'Uburayi, Uefa, rishinja rutahizamu Cristiano Ronaldo wa Juventus kugira "imyitwarire itaboneye" ubwo yishimiraga gutsinda igitego mu mukino wa kimwe cy'umunani cya Champions League ikipe ye yasezereyemo Atletico Madrid.

Cristiano w'imyaka 34 y'amavuko yagaragaye nk'uwigana umutoza Diego Simeone wa Atletico Madrid, wahindukiriye abafana agasa nk'uwifashe hagati y'amaguru ubwo ikipe ye yatsindaga Juventus ibitego 2-0 mu mukino ubanza.

Cristiano yabikoze ubwo yari amaze gutsinda igitego cya nyuma muri bitatu yatsinze muri uwo mukino wo kwishyura Juventus yatsinze ku bitego 3-0.

Biteganyijwe ko Uefa ifata umwanzuro kuri icyo kirego ku wa kane w'iki cyumweru.

Mu mukino ubanza, umutoza Simeone yahanishijwe gucibwa amande y'ibihumbi 20 by'ama-Euro kubera uko yishimiye intsinzi.

Juventus yatomboye gukina na Ajax mu mikino ya kimwe cya kane cy'iri rushanwa.