Tanzaniya yiyongereye kuri Uganda, u Burundi na Kenya mu kubona itike y'imikino y'igikombe cy'Afurika

Umukinnyi Mbwana Samatta wa Tanzaniya ni umwe mu bagize ikipe yahesheje igihugu cyabo itike y'imikino y'igikombe cy'Afurika cy'uyu mwaka izabera mu Misiri Uwufise ububasha kw’isanamu Getty Images
Image caption Umukinnyi Mbwana Samatta wa Tanzaniya ni umwe mu bagize ikipe yahesheje igihugu cyabo itike y'imikino y'igikombe cy'Afurika cy'uyu mwaka izabera mu Misiri

Ikipe y'igihugu y'umupira w'amaguru ya Tanzaniya yanyagiye Uganda ibitego 3-0 mu mukino wabereye i Dar es Salaam ku cyumweru, ibona itike yo gukina imikino y'igikombe cy'Afurika cy'ibihugu y'uyu mwaka, ku nshuro ya mbere guhera mu mwaka wa 1980.

Taifa Stars - nkuko ikipe y'igihugu ya Tanzaniya yitwa - yabonye intsinzi yari icyeneye muri iri tsinda L ngo yiyongere kuri Uganda na yo yamaze kubona itike yo kwitabira iyi mikino izabera mu Misiri, kuva ku itariki ya 21 y'ukwa gatandatu kugera ku ya 19 y'ukwezi kwa karindwi.

Muri iri tsinda L, Lesotho yanganyije na Cap-Vert 0-0, bihita bifasha Tanzaniya kubona itike nk'ikipe ya kabiri mu itsinda.

Bivuze ko amakipe ane yo muri Afurika y'uburasirazuba - Tanzaniya, Uganda, u Burundi na Kenya - azitabira iyi mikino y'igikombe cy'Afurika cy'ibihugu y'uyu mwaka.

Mbere y'uwo mukino wo ku cyumweru, Uganda yari itaratsindwa n'igitego na kimwe muri iyi mikino yo gushaka itike yo kwitabira iyo mikino y'igikombe cy'Afurika cy'ibihugu y'uyu mwaka wa 2019.

Uwo muhigo yari ifite wakuriweho i Dar es Salaam mu mukino wayo wa gatandatu ari na wo wa nyuma mu itsinda ryayo ubwo yahabwaga isomo rya ruhago na Taifa Stars ya Tanzaniya.

Igitego cya mbere cyinjijwe na Simon Msuva ku munota wa 21 w'umukino, Erasto Nyoni ashyiramo icya kabiri mu gice cya kabiri, Aggrey Morris na we azagushyiramo icya gatatu ari na cyo cya nyuma muri uwo mukino wanditse amateka muri Tanzaniya.

Nubwo Tanzaniya yari yatsinze uwo mukino biyoroheye, abafana n'abakinnyi b'ikipe y'igihugu ya Tanzaniya bari bagikurikirana n'umutima uhagaze umukino waberaga i Praia mu murwa mukuru wa Cap-Vert aho - iyo Lesotho izakuwutsinda - inzozi zabo zo kubona itike zari kuba zirangiriye aho.

Ikipe y'igihugu ya Tanzaniya, itozwa na Emmanuel Amunike wigeze kuba umukinnyi ukina ku ruhande mu ikipe y'igihugu ya Nigeria, ubu noneho igiye kwitegura iyo mikino y'igikombe cy'Afurika cy'ibihugu, nyuma y'imyaka 39 yari ishize itayigaragaramo.

Lesotho na Cap-Vert byo byasezerewe.