ONU inenga impuzamashyirahamwe y'imikino ngororangingo ku kibazo cya Caster Semenya

Umunya-Afurika y'epfo Caster Semenya afite imidali ibiri wa Olympike mu gusiganwa ku maguru muri metero 800 Uwufise ububasha kw’isanamu Getty Images
Image caption Umunya-Afurika y'epfo Caster Semenya afite imidali ibiri wa Olympike mu gusiganwa ku maguru muri metero 800

Akanama k'uburenganzira bwa muntu mu muryango w'abibumbye kavuga ko gahunda zo gushyira mu byiciro abagore bakina imikino ngororangingo ariko bafite umusemburo wa kigabo uzwi nka testostérone "zinyuranyije n'uburenganzira mpuzamahanga bw'ikiremwa muntu".

Umunya-Afurika y'epfo Caster Semenya w'imyaka 28 y'amavuko ufite umudali wa Olympike mu gusiganwa ku maguru muri metero 800, ari kujuririra icyemezo cy'impuzamashyirahamwe y'imikino ngororangingo ku isi ishaka kugena ingano ntarengwa y'uwo musemburo wa kigabo.

ONU itangaza ko izo gahunda z'iyo mpuzamashyirahamwe "zadacyenewe, zikojeje isoni kandi ziteje ibyago".

Impuzamashyirahamwe y'imikino ngororangingo ku isi ivuga ko ONU yahawe "amakuru atari yo" kuri iyo ngingo.

Bijyanye n'amategeko y'iyi mpuzamashyirahamwe yo mu mwaka ushize wa 2018, abagore bakina imikino ngororangingo muri kamere yabo bafite ibigero byo hejuru by'umusemburo wa kigabo baba bakwiye gusiganwa n'abagabo keretse bafashe imiti yo kugabanya uwo musemburo.

Ni amategeko areba abagore basiganwa guhera ku ntera ya metero 400 kugera ku ntera irenga gato metero 1500.

'Gutanga urugero rudashingiye kuri siyansi'

Ayo mategeko anasaba ko abo bagore bakina imikino ngororangingo bagomba guhamisha ibyo bigero by'imisemburo ya kigabo ku gipimo kiri munsi y'icyagenwe na muganga "mu gihe nibura cy'amezi atandatu mbere yuko bitabira irushanwa".

Ikibazo cy'aba bakinnyi b'abagore cyagiweho impaka muri uku kwezi kwa gatatu mu nama ya 40 y'akanama k'uburenganzira bwa muntu muri ONU, intumwa zari ziyirimo zisaba ko hategurwa icyegeranyo kirambuye kizigwaho mu nama itaha.

Hagati aho, aka kanama k'uburenganzira bwa muntu muri ONU kabaye gatangaje "impungenge" gafite ku migambi y'impuzamashyirahamwe y'imikino ngororangingo ku isi.

Kavuga ko gashaka ko iyi mpuzamashyirahamwe "yirinda gushyiraho no gukurikiza ingamba n'imigenzo ihatira cyangwa ikotsa igitutu abakobwa bakina imikino ngororangingo cyo gukorerwaho ibikorwa byo kwa muganga bidacyenewe, bikojeje isoni kandi biteza ibyago ngo babone kwitabira amarushanwa".

Impuguke ziherutse kwandika mu kinyamakuru cyo mu Bwongereza gitangaza ubushakashatsi mu buvuzi cya British Medical Journal zivuga ko amategeko y'iyi mpuzamashyirahamwe afite ibyago byo "gutanga urugero rudashingiye kuri siyansi ku bindi bibazo bitewe nuko umuntu yavutse".