Bayern Munich yaguze myugariro Lucas Hernandez wa Atletico Madrid

Hernandez ari mu bagize ikipe y'igihugu y'Ubufaransa yatwaye igikombe cy'isi mu mikino yabereye mu Burusiya ku mpeshyi yo mu mwaka ushize wa 2018 Uwufise ububasha kw’isanamu Getty Images
Image caption Hernandez ari mu bagize ikipe y'igihugu y'Ubufaransa yatwaye igikombe cy'isi mu mikino yabereye mu Burusiya ku mpeshyi yo mu mwaka ushize wa 2018

Ikipe ya Bayern Munich yo mu Budage yaguze myugariro Lucas Hernandez ukinira Atletico Madrid ngo ayikinire mu gihe cy'imyaka itanu kuri miliyoni 80 z'ama-Euro - ya mbere menshi cyane iyi kipe iguze umukinnyi mu mateka yayo.

Biteganyijwe ko uyu Hernandez w'imyaka 23 y'amavuko wari mu ikipe y'igihugu y'Ubufaransa yatwaye igikombe cy'isi cyo mu mwaka ushize wa 2018, atangira gukinira iyi kipe iyoboye shampiyona ya Bundesliga ku itariki ya mbere y'ukwezi kwa karindwi uyu mwaka.

Ubwo yakorerwaga ibizamini n'abaganga ba Bayern, basanze afite ikibazo cy'imitsi yangiritse mu ivi rye ry'iburyo, nuko ku munsi w'ejo ku wa gatatu ahita abagwa.

Hernandez yagize ati: "Mu by'ukuri uyu ni umunsi w'ingenzi mu mwuga wanjye wo gukina umupira w'amaguru".

"Bayern Munich ni imwe mu makipe akomeye cyane i Burayi ndetse no ku isi. Nshimishijwe no gushobora kuba hamwe na Bayern duhatanira ibikombe bishoboka byose".

Hernandez ushobora gukina rwagati muri ba myugariro cyangwa ku ruhande rw'ibumoso nka myugariro, yakiniye Atletico Madrid imikino 67 ya shampiyona ya La Liga yo muri Espanye, anatsindira ibikombe bya Europa League na Super Cup.

Amaze guhamagarwa mu ikipe y'igihugu y'Ubufaransa inshuro 15, akaba yarakinnye imikino yose Ubufaransa bwakinnye mu gikombe cy'isi giheruka kubera mu Burusiya.

Hasan Salihamidzic, umuyobozi ushinzwe iby'imikino muri Bayern, yagize ati: "Nishimiye cyane kuba nshoboye kugura umwe muri ba myugariro b'intyoza ku isi".

"Lucas azakomeza umuco mwiza wacu w'abakinnyi b'umupira w'amaguru b'Abafaransa avugurure ikipe yacu".