Ole Gunnar Solskjaer yagizwe umutoza w'igihe kirambye wa Manchester United

Ole Gunnar Solskjaer yafashije Manchester United kugera mu mikino ya kimwe cya kane cya Champions League muri uyu mwaka w'imikino Uwufise ububasha kw’isanamu Getty Images
Image caption Ole Gunnar Solskjaer yafashije Manchester United kugera mu mikino ya kimwe cya kane cya Champions League muri uyu mwaka w'imikino

Ubuyobozi bw'ikipe ya Manchester United bwagennye Ole Gunnar Solskjaer nk'umutoza w'igihe kirambye w'iyi kipe, ahabwa kontaro y'imyaka itatu.

Uyu Munya-Norvège w'imyaka 46 y'amavuko yageze muri iyi kipe nk'umutoza w'inzibacyuho mu kwezi kwa cumi na kabiri k'umwaka ushize wa 2018, asimbura Jose Mourinho wari umaze kwirukanwa.

Ole Gunnar yakiniye iyi kipe mu myaka 11 y'imikino ndetse atsinda n'igitego cy'intsinzi mu mukino wa nyuma wa Champions League wo mu mwaka wa 1999.

Yagize ati: "Aka ni akazi namye mfite inzozi zo gukora none rero ibyishimo byandenze kubera aya mahirwe ngize yo kuyobora [gutoza] iyi kipe mu gihe kirekire".

"Kuva ku munsi wa mbere ngera aha, niyumvise nk'umwana uri iwabo muri iyi kipe idasanzwe. Ni ishema kuba umukinnyi wa Manchester United no gutangira umwuga wanjye w'ubutoza hano".

"Amezi macye ashize yambereye meza cyane".

Ubwo yatangiraga gutoza iyi kipe by'inzibacyuho mu mwaka ushize, yari iri ku mwanya wa gatandatu ku rutonde rw'agateganyo rwa shampiyona ya Premier League, irushwa amanota 11 n'iya kane kuri urwo rutonde.

Ariko ubu iyi kipe imaze gutsindwa inshuro imwe gusa muri shampiyona - mu mukino wayihuje na Arsenal muri uku kwezi kwa gatatu ku kibuga cya Arsenal - mu mikino 13 amaze kuyitoza. Kuri ubu, Manchester United ikaba irushwa amanota abiri na Arsenal iri ku mwanya wa kane.

Ole Gunnar yanafashije Manchester United kubona itike yo gukina imikino ya kimwe cya kane cya Champions League muri uyu mwaka w'imikino - bwa mbere guhera mu mwaka wa 2014.

Ed Woodward, umuyobozi mukuru wungirije wa Manchester United, yavuze ko aka kazi Ole Gunnar "yari agakwiye rwose".

Ole Gunnar abaye umutoza wa kane w'igihe kirambye utoje Manchester United kuva Sir Alex Ferguson yajya mu kiruhuko cy'izabukuru mu mwaka wa 2013.