Umutoza Ole Gunnar Solskjaer avuga ko azakoresha 'neza' amafaranga yo kugura abakinnyi

Ku wa kane w'iki cyumweru, Ole Gunnar Solskjaer yashyize umukono kuri kontaro y'imyaka itatu atoza Manchester United Uwufise ububasha kw’isanamu Getty Images
Image caption Ku wa kane w'iki cyumweru, Ole Gunnar Solskjaer yashyize umukono kuri kontaro y'imyaka itatu atoza Manchester United

Umutoza Ole Gunnar Solskjaer wa Manchester United avuga ko atazakoresha amafaranga uko yiboneye agura abakinnyi ku mpeshyi y'uyu mwaka.

Ole Gunnar wemejwe ku wa kane w'iki cyumweru nk'umutoza w'igihe kirambye w'iyi kipe, ari guhita abazwa niba azavugurura iyi kipe yitegura umwaka utaha w'imikino.

Jose Mourinho wabanjirije uyu Munya-Norvège w'imyaka 46 y'amavuko, yatanze miliyoni 360 z'amapawundi mu kugura abakinnyi, agaruza gusa miliyoni 75 z'amapawundi.

Ariko Ole Gunnar yavuze ko atazihutira cyane kujya ku isoko ryo kugura abakinnyi. Yagize ati: "Ntabwo tuzakoresha amafaranga byo kuyakoresha gutyo gusa".

Yabwiye televiziyo y'iwabo muri Norvège ati: "United ni ikipe ifite amafaranga, ariko abantu banzi bazi ko nzakoresha ayo mafaranga mu buryo bwiza".

Mu mafaranga menshi Mourinho wamubanjirije yakoresheje mu kugura abakinnyi, Paul Pogba na Romelu Lukaku bonyine gusa ni bo bagize icyo bafasha iyi kipe kigaragara, mu gihe bamwe - urugero rwiza nka Alexis Sanchez - bisa nkaho nta na gito bafashije iyi kipe.

Mu gihe Ole Gunnar yamaze gushyira umukono kuri kontaro yo gutoza Manchester United mu gihe cy'imyaka itatu - kontaro ifite agaciro karenga gato miliyoni 21 z'amapawundi, bigaragara ko azotswa igitutu cyo guhindura iyi kipe ikaba mu makipe ahatanira igikombe cya shampiyona ya Premier League.

Amakuru avuga ko Manchester United yaba iteganya kugura abakinnyi b'Abongereza bakiri bato Jadon Sancho na Callum Hudson-Odoi.

Byiyongera kuri abo bakinnyi iteganya kuba yagura, Manchester United kandi irashaka no kongerera kontaro abakinnyi barimo umunyezamu David de Gea na rutahizamu Marcus Rashford - bombi bafite kontaro zisanzwe zizarangira mu mwaka utaha wa 2020.