Fulham yasezerewe muri Premier League nyuma yo kunyagirwa na Watford

Fulham yatsinzwe ibitego 76 muri uyu mwaka w'imikino ndetse itsindira amanota abiri gusa mu mikino yose yakinnye yasuye Uwufise ububasha kw’isanamu Reuters
Image caption Fulham yatsinzwe ibitego 76 muri uyu mwaka w'imikino ndetse itsindira amanota abiri gusa mu mikino yose yakinnye yasuye

Ikipe ya Fulham yasezerewe muri shampiyona y'umupira w'amaguru mu cyiciro cya mbere mu Bwongereza izwi nka Premier League, igifite imikino itanu yo gukina, nyuma yo kunyagirwa n'ikipe ya Watford ku kibuga Vicarage Road cya Watford ku munsi w'ejo ku wa kabiri.

Fulham yasabwaga kudatsindwa ngo ishobore kuba yimuriye mu cyumweru gitaha kumanuka mu cyiciro cya kabiri kwayo kwagombaga kuba uko byagenda kose.

Kandi igice cya mbere cyarangiye amakipe yombi anganya igitego 1-1, nyuma yaho Ryan Babel wa Fulham yari amaze kwishyura igitego cyari cyinjijwe na Abdoulaye Doucouré wa Watford.

Ariko ibitego byo mu gice cya kabiri cy'uwo mukino by'abakinnyi Will Hughes, Troy Deeney na Kiko Femenia ba Watford byahise bisubiza ako kanya Fulham muri shampiyona y'icyiciro cya kabiri.

Fulham yatanze miliyoni zirenga 100 z'amapawundi mu kugura abakinnyi 12 bashya ku mpeshyi ishize, ariko nta mupira unogeye ijisho iyi kipe yigeze igaragaza muri uyu mwaka w'imikino.

Kari agahinda mu maso y'abakinnyi ba Fulham ubwo havuzwaga ifirimbi ya nyuma isoza uwo mukino, yanashimangiye ko mu mwaka utaha w'imikino iyi kipe izaba ikinana n'amakipe nka Huddersfield muri shampiyona y'icyiciro cya kabiri.

Itariki ya kabiri y'ukwezi ka kane ikaba inanditse amateka nk'itariki ya hafi cyane igeze amakipe abiri yombi asezerewe muri Premier League.