Kongo mu itsinda rimwe na Misiri, u Burundi hamwe na Nigeria mu gikombe cy'Afurika cy'uyu mwaka

Tombola yuko amakipe azahura mu matsinda yabereye mu Misiri ejo ku wa gatanu, ibera hafi y'umujyi ndangamurage wa Giza Uwufise ububasha kw’isanamu Reuters
Image caption Tombola yuko amakipe azahura mu matsinda yabereye mu Misiri ejo ku wa gatanu, ibera hafi y'umujyi ndangamurage wa Giza

Igihugu cya Misiri kizakira imikino y'igikombe cy'Afurika cy'ibihugu cy'umupira w'amaguru cy'uyu mwaka wa 2019, kizahura na Repubulika ya Demokarasi ya Kongo mu itsinda A ririmo n'amakipe y'ibihugu ya Uganda na Zimbabwe.

Cameroun ifite igikombe cy'ubushize iri mu itsinda F ihuriyemo n'ibihugu bya Ghana, Bénin na Guinea-Bissau.

Irushanwa ry'uyu mwaka rizatangira ku itariki ya 21 y'ukwezi kwa gatandatu risozwe ku itariki ya 19 y'ukwezi kwa karindwi - bivuze ko abakinnyi bakinira ku mugabane w'Uburayi batazacikanwa n'imikino y'amakipe bakinira.

Iri rushanwa ry'uyu mwaka ni ryo rya mbere rizaba ryitabiriwe n'amakipe menshi - amakipe 24 - kurusha amarushanwa yabanje, kandi ni naryo rya mbere rizaba ribaye ku mpeshyi y'i Burayi, aho kuba mu kwezi kwa mbere cyangwa ukwa kabiri.

Tombola yuko amakipe azahura mu matsinda yabereye mu Misiri ejo ku wa gatanu, ibera hafi y'umujyi ndangamurage wa Giza.

Hervé Renard utoza Maroc azaba ashaka kwandika amateka yo gutsindira iki gikombe inshuro eshatu - atoza ikipe y'igihugu ya gatatu. Ikipe y'igihugu ya Maroc iri mu itsinda D, rinarimo imwe mu makipe yatozaga agatwara iki gikombe - ikipe y'igihugu ya Côte d'Ivoire. Rinarimo kandi Afurika y'epfo na Namibiya.

U Burundi na Madagascar - abiri mu makipe atatu yitabiriye iri rushanwa ku nshuro ya mberer mu mateka yayo - biri mu itsinda B aho biri kumwe na Nigeria na Guinea.

Mauritania - ikipe ya gatatu nayo yitabiriye iri rushanwa ku nshuro mbere mu mateka yayo - iri mu itsinda E ihuriyemo na Tuniziya, Mali na Angola.

Amakipe abiri muri buri tsinda ni yo azakomeza mu mikino ya kimwe cy'umunani, ndetse n'amakipe ane ya mbere yo ku mwanya wa gatatu muri buri tsinda nayo akazakomeza.

Dore uko amatsinda yose ateye:

Itsinda A: Misiri, Repubulika ya Demokarasi ya Kongo, Uganda, Zimbabwe

Itsinda B: Nigeria, Guinea, Madagascar, u Burundi

Itsinda C: Senegali, Algeria, Kenya, Tanzaniya

Itsinda D: Maroc, Côte d'Ivoire, Afurika y'epfo, Namibiya

Itsinda E: Tuniziya, Mali, Mauritania, Angola

Itsinda F: Cameroun, Ghana, Bénin, Guinea-Bissau

Ibindi bisa n’ibi