TP Mazembe yatsinze Simba, ibona itike ya kimwe cya kabiri muri Champions League nyafurika

Igikombe gihabwa ikipe yegukanye irushanwa ry'amakipe yabaye aya mbere iwayo ku mugabane w'Afurika Uwufise ububasha kw’isanamu Getty Images

Tout-Puissant (TP) Mazembe yo muri Repubulika ya Demokarasi ya Kongo yarokotse gusezererwa hakiri kare mu irushanwa ry'amakipe yabaye aya mbere iwayo ku mugabane w'Afurika (Champions League nyafurika), nyuma yo gutsinda Simba yo muri Tanzaniya ibitego 4-1 mu mukino wo kwishyura.

Yahise iba ikipe ya mbere ibonye itike ya kimwe cya kabiri mu mikino y'irushanwa ry'uyu mwaka.

Muri uwo mukino wabereye i Lubumbashi ejo ku wa gatandatu, Simba yo muri Tanzaniya ni yo yari yafunguye amazamu, ku gitego cy'umukinnyi Emmanuel Okwi ukomoka muri Uganda yinjije ku munota wa kabiri w'umukino.

Ariko TP Mazembe yatsindiye iki gikombe inshuro eshanu, yaje gukomeza guhatana ndetse ibona igitego cyo kwishyura cyinjijwe na Kabaso Chongo ukomoka muri Zambiya, ku munota wa 23 w'umukino, nuko nyuma y'iminota 15 Elia Meschak ukomoka muri Kongo ashyiramo icya kabiri.

Mu gice cya kabiri cy'umukino, Trésor Mputu na Jackson Muleka - bakomoka muri Kongo - na bo baje buri umwe kwinjiza igitego, umukino urangira utyo TP Mazembe isezereye Simba.

Umukino ubanza wabereye i Dar es Salaam mu cyumweru gishize, wari warangiye amakipe yombi anganya 0-0, umukino Simba yanahushijemo penaliti.

Mamelodi Sundowns yo muri Afurika y'epfo nayo yabonye itike ya kimwe cya kabiri imaze gusezerera Al Ahly yo mu Misiri ku giteranyo cy'ibitego 5-1 mu mikino yombi, nubwo bwose mu mukino wo kwishyura yatsindiwe mu Misiri igitego 1-0.

Espérance yo muri Tuniziya ifite igikombe cy'ubushize cy'iri rushanwa, nayo yabonye itike ya kimwe cya kabiri nyuma yo gusezerera CS Constantine yo muri Algeria.

Cyo kimwe na Wydad Casablanca yo muri Maroc nayo yabonye itike ya kimwe cya kabiri, isezereye Horoya yo muri Guinea-Conakry itozwa na Didier Gomes Da Rosa, wahoze atoza Rayon Sports yo mu Rwanda.