Leganes yanganyije na Real Madrid, iyibonaho inota bwa mbere

Karim Benzema ubu amaze gutsinda ibitego byose bitanu Real Madrid iheruka gutsinda muri La Liga Uwufise ububasha kw’isanamu Reuters
Image caption Karim Benzema ubu amaze gutsinda ibitego byose bitanu Real Madrid iheruka gutsinda muri La Liga

Ikipe ya Leganes yabonye inota bwa mbere na mbere kuri Real Madrid bituranye, nyuma yo kunganya mu mukino wa shampiyona ya La Liga yo muri Espanye wabaye ejo ku wa mbere.

Leganes iri ku mwanya wa 11 ku rutonde rw'agateganyo rwa La Liga, ni yo yafunguye amazamu ku gitego cya myugariro Jonathan Silva, ku mupira yari ahawe na rutahizamu Martin Braithwaite.

Ariko Karim Benzema yaje kucyishyura ubwo yari agerageje bwa kabiri, nyuma yaho umunyezamu Ivan Cuellar wa Leganes yari yakuyemo ishoti ye.

Real iri ku mwanya wa gatatu ku rutonde rw'agateganyo, yakinaga umukino wayo wa mbere wa La Liga ikinnye ku wa mbere nijoro mu myaka irenga ine ishize, umunsi ubundi udakunze guhabwa amakipe akomeye muri shampiyona.

Iyi kipe itozwa na Zinedine Zidane ubu isigaranye gito cyo guharanira muri uyu mwaka w'imikino, mu gihe yamaze kuva mu makipe ahatanira igikombe cya shampiyona n'ibindi bikombe, kandi ikaba nta byago ifite bigaragara byo kuzabura mu irushanwa rya Champions League ryo mu mwaka utaha w'imikino.

Ibindi bisa n’ibi